قاراعاندىدا براكونەرلەردىڭ قولىنان مەرت بولعان ينسپەكتوردىڭ دوستارى ونىڭ ارىپتەسىنەن كۇدىكتەنەدى

2093
Adyrna.kz Telegram

قاراعاندىدا براكونەرلەردىڭ قولىنان مەرت بولعان ينسپەكتوردىڭ دوستارى مارقۇم ەرلان نۇرعاليەۆكە «حالىق قاھارمانى» اتاعىن بەرۋدى سۇراپ وتىر. سونىمەن قاتار ولار تەرگەۋدىڭ ءادىل بولۋىن تالاپ ەتىپ، ەكىنشى ينسپەكتوردان كۇدىكتەنەتىندەرىن جاسىرمادى.

قاراعاندىلىق قورىقشىنى مەرت قىلعاندار دا پوگون تاققانداردان قامقورلىق كورگەن دەپ توپشىلايدى ەرلان نۇرعاليەۆتىڭ جاقىندارى. كيىكتەردى قورۋمەن ءجۇرىپ، قاپىدا قىلمىسكەرلەر قولىنان جان تاپسىرعان ينسپەكتوردىڭ كەشە تۋعان كۇنى ەدى. وسى ورايدا مارقۇمنىڭ اۋىلداس، دوستارى استانادا جينالىپ، ەلباسىعا ۇندەۋ جاسادى. ولار قورىقشىعا «حالىق قاھارمانى» اتاعىن بەرۋدى سۇراۋدا. ودان بولەك، قىلمىستى تولىققاندى زەرتتەپ، تەرگەۋ كەرەك دەپ تالاپ ەتىپ جاتىر. كيىك مۇيىزدەرىن شەتەلگە كەدەرگىسىز ساتۋعا جاعداي جاساپ جاتقان تۇلعالار دا جاۋاپقا تارتىلۋى كەرەك دەيدى، دەپ حابارلايدى “ەۋرازيا ءبىرىنشى ارناسىنا”سىلتەمە جاساپ Stan.kz.

«ول دا بار، ۇلكەن ادامدار. ويتكەنى جاڭاعىنى ۇستاسا: «سەن موينىڭا ال، قالعاندارىن ايتپاي-اق قوي»، – دەپ ايتادى. ول جالعىز ءوزى. ويتكەنى اناۋ ىستەدى، مىناۋ ىستەدى دەسە، كوبەيەدى عوي. ۇيىمداسقان قىلمىستىق توپ بولىپ كەتەدى. ۇشەۋى ۇستالدى، سوسىن قاشىپ كەتتى، قايتادان ۇستالدى، ارمەن قاراي. ەكىنشى كولىكتە بولعاندار كىم؟ ول جونىندە نەگە ايتپايدى؟» – دەيدى ەرلان نۇرعاليەۆتىڭ ارىپتەسى ءسارۋار اپىراەۆ.

ەستەرىڭىزگە سالساق، قاراعاندى وڭىرىندەگى قاندى قىلمىس ەكى اپتا بۇرىن بولعان ەدى. كيىك اتۋمەن جۇرگەن براكونەرلەردىڭ ۇستىنەن تۇسكەن ەكى ينسپەكتور سوققىعا جىعىلىپ، ءبىرى ەرلان نۇرعاليەۆ كوز جۇمعان. جانىندا بولعان پەتر نيتسىك اۋىر جاراقاتپەن اۋرۋحاناعا تۇسكەن بولاتىن. مارقۇم ەرلاننىڭ جولداستارى ەكىنشى ينسپەكتور نيتسىكتان دا كۇدىكتەنىپ وتىرعاندارىن جاسىرمادى.

«ول ەگەر قاۋقار جاساعاندا، ەرلان ەكى ادامعا بوي بەرمەيدى. ونى مىنا تۇرعان جولداستارى، ءبىز ءبارىمىز بىلەمىز. ەرلاننىڭ ارپالىسقان جەرى تاپتالعان جەر. جىلقى ۇستاعاننان دا كەم ەمەس ەندى. ءۇش جەردە قانى قالعان، ۇيىپ قالعان. ال نيتسىكتىڭ جاتقان جەرىندە ءبىر-اق جەرىندە ۇيىعان قان بار. ارپالىسقان ءىز كورىنبەيدى وندا»، – دەيدى ەرلان نۇرعاليەۆتىڭ سىنىپتاسى ابزال ماساباەۆ.

 

پىكىرلەر