Qaraǵandyda brakonerlerdiń qolynan mert bolǵan ınspektordyń dostary marqum Erlan Nurǵalıevke «Halyq qaharmany» ataǵyn berýdi surap otyr. Sonymen qatar olar tergeýdiń ádil bolýyn talap etip, ekinshi ınspektordan kúdiktenetinderin jasyrmady.
Qaraǵandylyq qoryqshyny mert qylǵandar da pogon taqqandardan qamqorlyq kórgen dep topshylaıdy Erlan Nurǵalıevtiń jaqyndary. Kıikterdi qorýmen júrip, qapyda qylmyskerler qolynan jan tapsyrǵan ınspektordyń keshe týǵan kúni edi. Osy oraıda marqumnyń aýyldas, dostary Astanada jınalyp, Elbasyǵa úndeý jasady. Olar qoryqshyǵa «Halyq qaharmany» ataǵyn berýdi suraýda. Odan bólek, qylmysty tolyqqandy zerttep, tergeý kerek dep talap etip jatyr. Kıik múıizderin shetelge kedergisiz satýǵa jaǵdaı jasap jatqan tulǵalar da jaýapqa tartylýy kerek deıdi, dep habarlaıdy “Eýrazııa birinshi arnasyna”silteme jasap Stan.kz.
«Ol da bar, úlken adamdar. Óıtkeni jańaǵyny ustasa: «Sen moınyńa al, qalǵandaryn aıtpaı-aq qoı», – dep aıtady. Ol jalǵyz ózi. Óıtkeni anaý istedi, mynaý istedi dese, kóbeıedi ǵoı. Uıymdasqan qylmystyq top bolyp ketedi. Úsheýi ustaldy, sosyn qashyp ketti, qaıtadan ustaldy, ármen qaraı. Ekinshi kólikte bolǵandar kim? Ol jóninde nege aıtpaıdy?» – deıdi Erlan Nurǵalıevtiń áriptesi Sárýar Apyraev.
Esterińizge salsaq, Qaraǵandy óńirindegi qandy qylmys eki apta buryn bolǵan edi. Kıik atýmen júrgen brakonerlerdiń ústinen túsken eki ınspektor soqqyǵa jyǵylyp, biri Erlan Nurǵalıev kóz jumǵan. Janynda bolǵan Petr Nıyk aýyr jaraqatpen aýrýhanaǵa túsken bolatyn. Marqum Erlannyń joldastary ekinshi ınspektor Nıyktan da kúdiktenip otyrǵandaryn jasyrmady.
«Ol eger qaýqar jasaǵanda, Erlan eki adamǵa boı bermeıdi. Ony myna turǵan joldastary, biz bárimiz bilemiz. Erlannyń arpalysqan jeri taptalǵan jer. Jylqy ustaǵannan da kem emes endi. Úsh jerde qany qalǵan, uıyp qalǵan. Al Nıyktyń jatqan jerinde bir-aq jerinde uıyǵan qan bar. Arpalysqan iz kórinbeıdi onda», – deıdi Erlan Nurǵalıevtiń synyptasy Abzal Masabaev.
