تسيفرلىق دامۋ، يننوۆاتسيالار جانە اوەروعارىش ونەركاسىبى ءمينيسترى باعدات مۋسين تۇركيادا جەر سىلكىنىسى كەزىندە قازا تاپقان ميربولات قۇرماشەۆ تۋرالى ەستەلىگىمەن ءبولىستى. ايتۋىنشا، مارقۇم ازامات ەكەۋى كۋرستاس بولعان، دەپ حابارلايدى «ادىرنا» ءتىلشىسى.
«سوڭعى ءۇمىت وتى ءسوندى. سەنگىم كەلمەيدى… سوڭىنا دەيىن ۇمىتتەنىپ ەدىك. الايدا ميرۋس باۋىرىمىزدان ايىرىلىپ قالدىق… ەكەۋمىز كۋرستاس بولدىق. ول وتە كرەاتيۆتى ەدى، اۋقىمدى دۇنيەلەر جاساعىسى كەلەتىن، تارتىمدىلىعىنىڭ ارقاسىندا ادامداردى ۇيىمداستىرا الاتىن. دىنگە بەرىك ادام ەدى. ماعجان («Astana Hub» باس ديرەكتورى –ماعجان ماديەۆ - رەد) استانا حابتى قۇرۋ بويىنشا العاشقى قادامدارىن باستاعاندا ول كوپ كومەك ەتتى، تەگىن، ەشقانداي كەلىسىمسىز. قولىنان كەلگەنىن ىستەپ، قازاقستاننىڭ IT-سالاسىن دامىتۋعا ۇلەسى مەن كومەگىن قوستى»،—دەدى ول.
مينيستر دوسىنىڭ قازاقستاندا بىرنەشە بيزنەس باستاماسى بولعانىن اتاپ ءوتتى.
«2020 جىلى مەملەكەتتىڭ قاتىسۋىمەن ءبىر-ەكى جوبانى ىسكە اسىرعىسى كەلدى. بىراق، مەملەكەت باسشىسى مەنى مينيستر ەتىپ تاعايىنداعان كەزدە ول جوبالاردان ءوز ەركىمەن باس تارتتى.
ارامىزدا تۇسىنىسپەۋشىلىك تۋدىراتىن جاعدايلاردى بولدىرماۋ ءۇشىن مەن يدەيالارىمدى شەت ەلدە جۇزەگە اسىرامىن دەدى.
ميرۋس - جيھانكەز، ءبىراز جەردە بولدى، بىراق تۇراقتالۋ ءۇشىن تۇركيانى تاڭداپ، سوڭعى ەكى جىل نەگىزىنەن سول جاقتا تۇرىپ جاتتى. پرەزيدەنتتىڭ انكاراعا رەسمي ساپارىنىڭ الدىنداعى قازاقستاندىق IT-ماماندارىنىڭ سول جاققا بارعانىن ءبارىڭىز بىلەتىن شىعارسىزدار. ءبىز سول كەزدە ولاردى ستامبۋلدىڭ بىرنەشە ءىرى IT-كومپانياسىنا اپارعان ەدىك. ميرۋس وسى ءىس-شارانىڭ نەگىزگى ۇيىمداستىرۋشىسى بولدى. ءبىز وعان استانا حابتىڭ وكىلى بولۋدى ۇسىندىق، ويتكەنى ەكى مەملەكەتتىڭ حابتارى مەن ماماندارىن جاقىنداستىراتىن ادامنىڭ بولۋى ماڭىزدى ەدى.
ستۋدەنتتىك كەزدەن دە ءبىراز جاقسى ەستەلىكتەر بار، جاقىن ارالاسقان جولداستارى ولاردى ايتىپ جاتار دەپ ويلايمىن.
يماندى بولسىن! جانىڭ ءجانناتتان ورىن تاپسىن، باۋىرىم»،—دەپ جازدى باعدات مۋسين.
