شىعىس قازاقستان وبلىسىنداعى سۋ قويمالارىن سۋ باسۋ قاۋپى بار. سول سەبەپتى قۇرىلىس جۇمىستارى جۇرگىزىلىپ جاتىر. بۇل تۋرالى وكق-دە وتكەن ءباسپاسوز ءماسليحاتىندا ەكولوگيا جانە تابيعي رەسۋرستار مينيسترلىگىنىڭ وكىلدەرى ايتتى، دەپ حابارلايدى “ادىرنا” ۇلتتىق پورتالى.
“ەلىمىزدە 10 ءىرى سۋ قويماسى بار. بۇگىنگى تاڭدا بارلىق گيدروتەحنيكالىق قۇرىلعىلار، سونىڭ ىشىندە سۋ قويمالارى تەكسەرىستەن ءوتتى. اپاتتىق جاعدايدا شىعىس قازاقستان وبلىسىنداعى ەكى سۋ قويماسى ترانزيتتىك رەجيمگە قويىلدى. ول سۋ قويمالارىندا قۇرىلىس جۇمىستارى جۇرگىزىلىپ جاتىر. سوندىقتان سۋ تاسقىنىن اپاتسىز وتكىزۋ ماقساتىندا سۋ جيناماي، ترانزيتتىك رەجيمگە قويىلدى”،- دەدى ەكولوگيا جانە تابيعي رەسۋرستار ۆيتسە-ءمينيسترى عاليدوللا ازيدۋللين.
ال، سۋ قويمالارىنداعى قاۋىپ ناۋرىز ايىندا بەلگىلى بولادى.
“سۋ باسۋ قاۋپى قازىرگى تاڭدا شىعىس قازاقستان وبلىسىندا. بىراق قازىر ناقتى اقپارات ايتۋ قيىن. سەبەبى نەگىزگى بولجام ناۋرىز ايىندا ايتىلادى. ناۋرىزعا دەيىن قازىر تەكسەرۋ جۇمىستارى جۇرگىزىلىپ، باقىلاۋعا الىنىپ وتىر. سۋدىڭ كولەمىنە سايكەس سۋ قويمالارىندا بوس سۋ سىيىمدىلىقتارى ۇيىمداستىرىلادى”، - دەدى عاليدوللا ازيدۋللين.
ۆيتسە-ءمينيستردىڭ سوزىنشە، سينوپتيكتەر ناۋرىز ايىنان باستاپ گيدرولوگيالىق بولجامدى اپتا سايىن ۇسىنادى. گيدرومەتەوجاعدايلار كۇرت وزگەرگەن كەزدە 2-3 تاۋلىك بۇرىن سۋ تاسقىنى قاۋپى تۋىنداۋى جايلى داۋىلدى ەسكەرتۋلەر حابارلانادى.
