نازارباەۆ قورى قۇرىلىمىنداعى مەكتەپتە. زورلانعان وقۋشىعا قاتىستى قىلمىستىق ءىس قوزعالدى

جۋىردا بالانىڭ اناسى “نەمولچي” قورىنا جۇگىنگەن.

"ونىڭ ۇزاق ۋاقىت بويى بۇقارالىق اقپارات قۇرالدارىنا بارۋعا باتىلى جەتپەدى. جاريا بولعانىن قالامادى. ەكى اپتا ءوتتى. وسى ەكى اپتا پوليتسيانىڭ تەرگەۋدى قالاي جۇرگىزەتىنىن، ساراپتاماعا نۇسقاۋدى قالاي بەرەتىنىن جانە وسى ساراپتامانى قالاي جۇرگىزەتىنىن بىلۋگە جەتكىلىكتى بولدى", - دەپ حابارلادى قور Instagram-داعى پاراقشاسىندا.

بالالاردىڭ قۇقىعىن قورعاۋ كوميتەتى اتالعان فاكتى بويىنشا قىلمىستىق ءىس قارالىپ جاتقانىن مالىمدەدى.

وقيعا كوميتەت پەن قۇقىق قورعاۋ ورگاندارىنىڭ باقىلاۋىندا. بالالاردىڭ قۇقىعىن قورعاۋ كوميتەتىنىڭ توراعاسى زارداپ شەككەن بالانىڭ اناسىمەن جانە حالىقارالىق مەكتەپتىڭ باسشىلىعىمەن بايلانىستا،- دەلىنگەن حابارلامادا.

اقپاراتتا ايتىلعانداي، بالانىڭ وتباسىنا كومەك ۇسىنىلدى.

كوميتەت باق بەتتەرىندە جاريالانعان ءار اقپاراتقا بارىنشا جاۋاپكەرشىلىكپەن قاراۋدى سۇرايدى. سەبەبى، بىزگە بالا تۋرالى دەرەكتەردىڭ قۇپيالىلىعىن ساقتاۋ جانە ونى قوعامدا تاراتپاۋ ماڭىزدى. وسىلايشا قيىن جاعدايعا تاپ بولعان بالا مەن وتباسىنىڭ تىنىشتىعىن قامتاماسىز ەتە الامىز، - دەدى كوميتەتتەن.

قالالىق پوليتسيا قر قك 121-بابىنىڭ 3-بولىگى بويىنشا تەرگەۋ جۇرگىزىلىپ جاتقانىن ءمالىم ەتتى.

الماتىداعى بەدەلدى مەكتەپتىڭ 1-سىنىپ وقۋشىسىن زورلاۋ دەرەگى بويىنشا تەرگەۋ باستالعانىن قالالىق پوليتسيا دەپارتامەنتىنىڭ (پب) ءباسپاسوز قىزمەتى دە راستادى، دەپ حابارلادى قازتاگ.

ءىستىڭ وبەكتيۆتى ءمان-جايلارىن انىقتاۋعا باعىتتالعان جەدەل-ىزدەستىرۋ شارالارىنىڭ كەشەنى جۇرگىزىلۋدە. تەرگەۋ بارىسى ەرەكشە باقىلاۋدا، - دەدى الماتى قالالىق ءىىد باستىعىنىڭ ءبىرىنشى ورىنباسارى نۇرلان الماسبەكوۆ.

قر قىلمىستىق كودەكسىنىڭ 121-بابىنىڭ 3-بولىگىمەن (سەكسۋالدىق سيپاتتاعى كۇش كورسەتۋ ارەكەتتەرى) قىلمىستىق ءىس قوزعالدى.

بۇل فاكتى بويىنشا ءتيىستى ساراپتامالار تاعايىندالدى، - دەدى پوليتسيا.

ايتا كەتەيىك، بۇعان دەيىن ەلىمىزدىڭ بالا قۇقىقتارى جونىندەگى ۋاكىل 1-ءشى سىنىپ وقۋشىسىنىڭ زورلانۋىنا قاتىستى ءىس باقىلاۋىندا ەكەنىن جەتكىزگەن ەدى. وقۋ ورنى قازاقستاننىڭ ەكس-پرەزيدەنتى نۇرسۇلتان نازارباەۆ قورىنىڭ قۇرىلىمىندا جۇمىس ىستەيدى.