ەۋرووداق 30 مىڭ ۋكراين ساربازىن جاتتىقتىرادى. ولار باتىس ەلدەرىنىڭ ۋكرايناعا بەرگەن اسكەري تەحنيكاسىن قولدانۋدى ۇيرەتپەك. بۇل تۋرالى ەۋروپالىق كوميسسيانىڭ بريۋسسەلدەگى شتاب-پاتەرىنەن Deutsche Welle جازدى، دەپ حابارلايدى «ادىرنا» ءتىلشىسى.
رەسمي مالىمدەمەلەر 3 اقپاندا كيەۆتە وتەتىن ەو-ۋكراينا سامميتىندە جاسالادى دەپ كۇتىلىپ وتىر.
«2 اقپان كۇنى ەۋروكوميسسيا باسشىسى ۋرسۋلا فون دەر ليايەن ۋكراينا ۇكىمەتىنىڭ مۇشەلەرىمەن كەزدەسەدى. ولار ۋكراينانىڭ ەۋروپالىق وداققا تەزىرەك قوسىلۋ مۇمكىندىگىن جانە رەسەي بيلىگىن اسكەري باسقىنشىلىعى ءۇشىن جاۋاپقا تارتاتىن ەۋروپا تريبۋنالىن قۇرۋ ماسەلەسىن تالقىلايدى.
وتكەن جىلدىڭ قاراشا ايىندا ەۋروپالىق ەلدەر ۋكراينا اسكەري قىزمەتكەرلەرىن وقىتۋ ميسسياسىن قۇردى. ودان كەيىن ۋكراينا قارۋلى كۇشتەرىنىڭ 15 مىڭ قىزمەتكەرى وقىتىلاتىنى ايتىلدى. دەگەنمەن، قازىر بۇل ساندى ەكى ەسەگە ارتتىرۋ تۋرالى شەشىم قابىلداندى. اتاپ ايتقاندا، اسكەريلەر ەۋروپالىق بروندى ماشينالاردى، سونىڭ ىشىندە ەو ەلدەرى ۋكرايناعا جاقىن ارادا جەتكىزە باستايتىن «لەوپارد-2» تانكتەرىن باسقارۋعا ۇيرەنەدى»،—دەلىنگەن حابارلامادا.
