«سوپىلىق-شيتتىك جوبا» ماسكەۋ ارقىلى جۇرگىزىلىپ جاتىر ما؟ - تۇراربەك قۇسايىنوۆ

4154
Adyrna.kz Telegram

سوعىسقۇمار ءپۋتيننىڭ ۋكرايناعا قارسى اگرەسسياسىن قاسيەتتى سوعىس دەپ جاريالاعان رف باس ءمۇفتيى تالعات تادجۋددين مەن قازاقستانداعى شيعالىق ءسۋفيزمنىڭ يدەولوگى يسماتۋللا تاقسىردىڭ ءوزارا دوستىعى نەنى بىلدىرەدى؟

ناقتىراق ايتسام يسماتۋللا تاقسىر وسىدان بىرنەشە اي بۇرىن رەسەي باس ءمۇفتيى ت.ءتادجۋدديننىڭ ارنايى شاقىرۋىمەن رەسەيدە بولىپ «ادىلەتتىك ورناتۋ ءۇشىن جەر بەتىنە ماحدي شىقتى، قازىر ول رەسەيدىڭ سىبىرىندە ءجۇر» دەپ اشىق مالىمدەمە جاسادى..

ايتپاقشى سوپى-زىكىرشىلەر وزدەرىن ءماحديدىڭ (ماحدي-پۋتين) ساربازى-اسكەرىمىز دەيدى.

ماحدي، ياعني ءمادى - شيتتەر ءۇشىن جوعالىپ كەتكەن ون ەكىنشى عايىپ يمام. ۇمىتپاسام وسىدان بىرنەشە جىل بۇرىن تەوكراتيالىق يراننىڭ نەگىزىن قالاعان س.ر.حومەينيدىڭ شاكىرتى، قازىرگى شيتەردىڭ ەڭ جوعارعى ءدىني جەتەكشىسى سەيد ءالي حامەنەيدىڭ گۇلىستان پروۆينتسياسىنداعى وكىلى ءھام جان دوسى سايد كازيم نۋر مۋفيدي- قازاقستاندىق يسماتۋللا باستاعان زىكىرشى-سوپىلاردىڭ دەلەگاتسياسىن رەسمي تۇردە قابىلداعان-دى.

وسى جانە باسقا دا شيزمگە قاتىستى جوبالار يسماتۋللاشى سوپىلاردى يرانمەن بايلانىستىرادى. ال يراننىڭ الەمدىك ساياساتتا رەسەيمەن مۇددەلەستىگىن ەسكەرسەك، «سوپىلىق-شيتتىك جوبا» ماسكەۋ ارقىلى جۇرگىزىلىپ جاتىر ما؟» دەگەن پىكىر قىلاڭ بەرەدى.

ەڭ سوراقىسى كەشە عانا يسماتۋللا تاقسىردىڭ سەرىگى جانە قمدب جانىنداعى ساراپشىلار كەڭەسىنىڭ وكىلى زىكىريا جانداربەك فەيسبۋكتە قانىشەر ءپۋتيننىڭ تاۋەلسىز ۋكرايناعا سوعىسىن اشىق تۇردە تولىقتاي قورعاپ، “ەگەر رەسەيدى قولداساڭ - اللانىڭ جاعىنداسىڭ، ال قارسى شىقساڭ - اللانىڭ قاھارىنا ۇشىرايسىڭ” دەگەن جازبا قالدىردى.

مەنىڭشە، بۇل جازبادا قازاقتاردى قارعىس اتقىر جاۋىز ءپۋتيننىڭ ۋكرايناعا قارسى اگرەسسيالىق سوعىسىنا ۇندەيتىن ماتىندەر جەتىپ ارتىلادى.

ايتىڭىزدارشى، قانىشەر ءپۋتيننىڭ يمپەرشىل، ياعني ازات ۋكرايناعا قارسى اگرەسسياسىن ءىس جۇزىندە قولداعان نەمەسە سوعان ىشتەي تىلەكتەس بولعان زىكىريا جانداربەك سياقتىلاردىڭ ءسوزى ءھام ريتوريكاسى سيرياداعى يگيل جانە اۋعانىستان-ۆازيريستانداعى "تاليبان" سەكىلدى ەكسترەميستىك توپتاردىڭ قۇرامىندا سوعىسقان تەرروريستەردەن قانداي ايىرماشىلىعى بار؟!

اتاپ ايتقاندا، ساناسى ورتاعاسىرلىق يدەيامەن ۋلانعان ءسالافي قازاقتار سيرياداعى "يگيل"-دىڭ باس تەرروريسى ءابۋ باكىر باعداديدىڭ امىرىنە وراي اللا ءۇشىن جانىن بەرىپ، الەمدە "يسلام حاليفاتىن" ورناتقىسى كەلدى، ال رامزان قادىروۆ باستاعان كاۆكاز سوپىلارى پۋتين (ماحدي) ءۇشىن بەيبىت ۋكراينا حالقىن قىرىپ، رەسەيدىڭ "ورىس الەمى" دەيتىن يمپەرشىل ساياساتىن ىسكە اسىرۋدا.

ال زىكىريا جانداربەك سياقتى يسماتۋللاشى سوپىلار ديكتاتور ءپۋتيننىڭ تەرروريستىك ءىس-ارەكەتىن جان-جاقتى قولداپ، الەمجەلى ارقىلى قازاق قوعامىنا ءدىني-ساياسي پروپاگاندا جاساپ جاتىر.

سوندىقتان دا، قر قۇزىرلى ورگاندارىنان قىلمىستىق كودەكستىڭ 161-بابى، ياعني باسقىنشىلىق سوعىستى تۇتاندىرۋعا ناسيحات جۇرگiزۋ نەمەسە جاريا تۇردە قولداۋ كورسەتۋ بويىنشا زىكىريا جانداربەكتىڭ سوزدەرىنە قۇقىقتىق باعا بەرۋدى سۇرايمىن!

تۇراربەك قۇسايىنوۆ

پىكىرلەر