25 جەلتوقساندا جاستارمەن كەزدەسۋ بارىسىندا ولي ماجليس سەناتىنىڭ توراعاسى تانزيلا نارباەۆا وزبەكستان ەشقاشان بىرەۋدىڭ وتارى بولمايتىنىن ايتتى، دەپ حابارلايدى «ادىرنا» ۇلتتىق پورتالى Gazeta.uz سايتىنا سىلتەمە جاساي وتىرىپ.
«ينتەرنەتتەن «وزبەكستانمەن مىنانى ىستەيىك، مىنانى ىستەيىك» دەگەن ءارتۇرلى سوزدەردى كورەسىز. وزبەكستان ەشقاشان بىرەۋدىڭ وتارى بولمايدى. سىزدەر مۇنى بىلەسىزدەر، ماعان ونى ءتۇسىندىرۋدىڭ قاجەتى جوق. بۇل ءبارىڭىزدىڭ جۇرەگىڭىزدە»، - دەدى پارلامەنتتىڭ جوعارعى پالاتاسىنىڭ باسشىسى.
وتكەن اپتادا «ادىلەتتى رەسەي» پارتياسىنىڭ تەڭ توراعاسى زاحار پريلەپين وزبەكستان مەن بۇرىنعى كسرو-نىڭ باسقا دا اۋماقتارىن رەسەيگە «اننەكسيالاۋدى» ۇسىندى. بۇل مالىمدەمە وزبەكستان جۇرتشىلىعىنىڭ وتكىر سىنىنا ۇشىرادى.
وزبەكستان سىرتقى ىستەر مينيسترلىگى رەسەيدىڭ تاشكەنتتەگى ەلشىسى ولەگ مالگينوۆتى شاقىرىپ، پريلەپيننىڭ مالىمدەمەسى ادەيى ارانداتۋشىلىق جانە ەكى ەل حالىقتارى اراسىنداعى قارىم-قاتىناسقا كەرى اسەر ەتۋى مۇمكىن ەكەنىن ايتتى. كوپ ۇزاماي رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا پريلەپيننىڭ سوزدەرى «رەسەي فەدەراتسياسىنىڭ رەسمي ۇستانىمىن كورسەتپەيدى» دەپ مالىمدەدى.
جۇما كۇنى پرەزيدەنت شاۆكات ميرزيەەۆ رەسپۋبليكالىق رۋحانيات جانە اعارتۋ كەڭەسىنىڭ وتىرىسىندا: «ءبىز بۇرىن ديپلوماتيا مەن ساياسات ارقىلى ءوز ماقساتى مەن مۇددەسىن قورعاعان الەمنىڭ قۋاتتى ورتالىقتارى اشىق قىسىم كورسەتۋگە، جانجال مەن قاقتىعىستار جولىنا تۇسكەنىنە كۋا بولىپ وتىرمىز»، - دەدى.
تانزيلا نارباەۆا جاستارمەن تىلدەسە وتىرىپ، وتكەن عاسىردىڭ باسىنداعى قوعامدىق-ساياسي اعارتۋ قوزعالىسىنىڭ وكىلدەرى – جاديدشىلەردىڭ قىزمەتىن زەرتتەۋدىڭ نەلىكتەن ماڭىزدى ەكەندىگى تۋرالى ماسەلەنى دە كوتەردى.
«ويىمىز بەن ءىسىمىز بىرلىكتە بولۋى كەرەك» دەپ بابالارىمىز اتاپ وتكەن. جاديدشىلەر ادامداردى نۇرعا بەت بۇرۋعا، زاماناۋي عىلىم مەن زاماناۋي كاسىپتەردى يگەرۋگە شاقىردى»، - دەپ اتاپ ءوتتى ول.
«ولار ۇزاق جىلدار بويىنا ۇمىت قالدى. ەندى، مىنە، قۇرمەتتى پرەزيدەنتىمىزدىڭ ءىس-ارەكەتىنىڭ ارقاسىندا ولار جارىققا شىعىپ جاتىر»، – دەيدى ءتانزيلا نارباەۆا.
اتالمىش جيىندا جاديدشىلەر تۋرالى ءسوز قوزعاعان شاۆكات ميرزيەەۆ: «بىزگە سۋ مەن اۋاداي، باتىستىڭ عىلىمي جەتىستىكتەرىمەن، ۇلتتىق قۇندىلىقتارمەن ساناساتىن، ءجاديدشى اتالارىمىز سياقتى ءبىلىمدى، كەمەل كادرلار كەرەك»، - دەدى.
«ادىرنا» ۇلتتىق پورتالى
