ماسكەۋدە ەۋرازيالىق وداققا قاتىسۋشى ەلدەر بالالاردىڭ پسيحيكالىق دامۋىنا جاعىمسىز اسەر ەتۋى ىقتيمال ويىنشىقتارعا قويىلاتىن تالاپتاردى ازىرلەۋگە كەلىستى. بۇل تۋرالى ۇكىمەتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«پسيحولوگيالىق-پەداگوگيكالىق قاۋىپسىزدىك» تالاپتارىن ەنگىزۋ ۇسىنىسى قازىرگى نارىقتا قورقىنىشتى، كۇش كورسەتۋ بەلگىلەرى بار، گيبريدتى جانە ت. ب. ويىنشىقتاردىڭ ءجيى كەزدەسۋىمەن بايلانىستى جاسالىپ وتىر. كەيبىر پسيحولوگتاردىڭ پىكىرىنشە، مۇنداي «قورقىنىشتى» ويىنشىقتار زورلىق-زومبىلىق پەن اگرەسسيامەن بايلانىستى ويىن سيۋجەتىن تۋدىرادى.
ويىنشىقتارعا ارنالعان قولدانىستاعى تەحنيكالىق رەگلامەنتتە تەك ماتەريالدارعا، توكسيكولوگيالىق-گيگيەنالىق جانە ميكروبيولوگيالىق كورسەتكىشتەرگە، فيزيكالىق جانە مەحانيكالىق، حيميالىق جانە ەلەكترلىك قاسيەتتەرگە، رادياتسيالىق قاۋىپسىزدىككە قويىلاتىن تالاپتار عانا بەلگىلەنگەن. وسىلايشا، نارىقتان «قورقىنىشتى» ويىنشىقتاردى الىپ تاستاۋ مۇمكىن ەمەس.
وتىرىستا ايتىلعان قازاقستاندىق تاراپتىڭ پىكىرىنشە، بۇل ماسەلەنى قاراستىرۋ ءۇشىن ويىنشىقتىڭ بالاعا كەرى اسەرىن انىقتايتىن ولشەمدەردى بەلگىلەيتىن ستاندارتتار قاجەت.
«بالالاردىڭ فيزيكالىق جانە پسيحيكالىق دەنساۋلىعىن قالىپتاستىرۋدىڭ ماڭىزدىلىعى كۇمان تۋدىرمايدى. قازاقستان 2015 جىلى ويىنشىقتارعا پسيحولوگيالىق-پەداگوگيكالىق ساراپتاما جۇرگىزۋ ءۇشىن تەحنيكالىق رەگلامەنتكە وزگەرىستەر ەنگىزۋگە باستاماشى بولدى. ول كەزدە مۇنداي ويىنشىقتاردىڭ بالانىڭ پسيحيكاسىنا جاعىمسىز اسەر ەتۋ كريتەريلەرىن ايقىنداۋ ستاندارتىنىڭ بولماۋىنا، عىلىمي زەرتتەۋلەر جۇرگىزۋ قاجەتتىلىگىنە بايلانىستى قۇجات قولداۋ تاپپادى»، — دەدى ەەك كەڭەسىندە قر دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا.
ونىڭ ايتۋىنشا، بۇگىندە نارىق ءتۇرلى ويىنشىقتار بار. سوندىقتان ويىنشىقتاردىڭ بالانىڭ پسيحيكاسىنا كەرى اسەر ەتۋ كريتەريلەرىن ايقىنداۋ ستاندارتىن ازىرلەۋ جانە ەۋرازيالىق وداق ەلدەرى دەڭگەيىندە ءتيىستى تارتىپتە پىسىقتاۋ ءۇشىن قولدانىستاعى تەحنيكالىق رەگلامەنتتەردى وزگەرتۋ جونىندە ۇسىنىستار ەنگىزۋ ۇسىنىلىپ وتىر.
