الەۋمەتتىك جەلىلەردە قازاقستاننىڭ تۇڭعىش پرەزيدەنتىنىڭ ۇلكەن قىزى داريعا نازارباەۆامەن بايلانىستىرىلاتىن لوندونداعى ءزاۋلىم ءۇيدىڭ سۋرەتتەرى جاريالاندى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
باق مالىمەتىنشە، بىرنەشە جىلدان بەرى ساتىلىمدا تۇرعان جىلجىمايتىن مۇلىككە ءالى كۇنگە دەيىن ساتىپ الۋشى تابىلماعان.
مالىمەتكە سايكەس، ءزاۋلىم ءۇي لوندوننىڭ بەدەلدى اۋداندارىنىڭ ءبىرى – Highgate گولف-كلۋبىنىڭ ماڭىنداعى Denewood Road كوشەسىندە ورنالاسقان. نىسان العاش رەت 2022 جىلدىڭ ناۋرىز ايىندا، قازاقستانداعى قاڭتار وقيعاسىنان كەيىن ساتىلىمعا شىعارىلعان. سول كەزدە ءۇيدىڭ باعاسى 11,8 ميلليون اقش دوللارى بولسا، قازىر ول 10,5 ميلليون دوللارعا دەيىن تومەندەتىلگەن. جالپى اۋماعى شامامەن 765 شارشى مەتردى قۇرايتىن ۇيدە جەتى جاتىن بولمە، التى جۋىنۋ بولمەسى، بىرنەشە قوناق بولمەسى، باسسەين، بيليارد زالى جانە قىسقى باق بار.
جاريالانعان فوتوسۋرەتتەر الەۋمەتتىك جەلى قولدانۋشىلارىنىڭ نازارىن ەرەكشە اۋداردى. كوپشىلىك ءساندى ينتەرەرمەن قاتار، ءۇي ىشىندەگى قازاقى كىلەمدەر مەن كورپەشەلەردى قىزۋ تالقىلاپ جاتىر.
ايتا كەتەيىك، بۇل جىلجىمايتىن مۇلىكتىڭ تۇپكى يەسى رەتىندە داريعا نازارباەۆانىڭ ەسىمى 2020 جىلى اتالعان. سول كەزدە ۇلىبريتانيانىڭ قىلمىسپەن كۇرەس جونىندەگى ۇلتتىق اگەنتتىگى اتالعان ءۇي مەن تاعى ەكى نىسانعا قاتىستى ساتىپ الۋ قاراجاتىنىڭ شىعۋ تەگىن ءتۇسىندىرۋدى تالاپ ەتىپ، ولاردى بۇعاتتاۋعا ارەكەت جاساعان. الايدا كەيىن لوندون سوتى بۇل مۇلىكتەرگە سالىنعان شەكتەۋدى الىپ تاستادى.
