جامبىل وبلىسىندا قازا تاپقان ساربازدىڭ دەنەسىنەن تابىلعان وزگە ادامداردىڭ بيوماتەريالدارى [شاۋەت داقتارى] تۋرالى بايانداعان قۇقىق قورعاۋشىنىڭ ومىرىنە “ايتىپ اۋىز جيعانشا” قاۋىپ ءتوندى. ىشكى ىستەر مينيسترلىگى وعان «ەتيكانى بۇزدى» دەپ ايىپ تاعىپ، قۇپيا تەرگەۋگە الماقشى، دەپ حابارلايدى “ادىرنا” ۇلتتىق پورتالى.
بىرنەشە كۇن بۇرىن مەرزىمدى قىزمەتتەگى اسكەري قىزمەتشىنى ءوز-وزىنە قول جۇمساۋ تۋرالى قىلمىستىق ءىس بويىنشا قۇقىق قورعاۋشى پراليەۆتىڭ ءباسپاسوز ءماسليحاتى ءوتتى. ءدال سول جەردە قۇقىق قورعاۋشى مامان مارقۇمعا ءۇش رەت سوت-مەديتسينالىق ساراپتاما جۇرگىزىلگەنىن حابارلادى. ونىڭ بىرەۋى تارازدا، ەكەۋى الماتىدا وتكەن. قايتىس بولعان ساربازدىڭ اۋىز قۋىسىندا جانە كيىمىندە وزگە ەر ادامداردىڭ گەنەتيكالىق بيوماتەريالدارى تابىلعانى بەلگىلى بولدى.
جالپاق جۇرتتىڭ سەلت ەتكىزگەن سوراقى جاڭالىقتى جاريالاعان قۇقىق قورعاۋشىنىڭ باسىنا قارا بۇلت ءۇيىرىلدى. بۇل جايلى قر ءىىم وكىلدەرى مالەمدەدى.
«پراليەۆ قىلمىستىق ءىستىڭ دەرەكتەرىن جاريا ەتىپ، شىندىققا سايكەس كەلمەيتىن ءوز تۇجىرىمدارىمەن تولىقتىردى. سونىمەن قاتار، قىجك-ءنىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى»، - دەلىنگەن قر ءىىم حابارلاماسىندا.
كۇنى كەشە قوعام بەلسەندىسى، قازاقتىڭ اياۋلى قىزى، ۇلت جاناشىرى كامشات تاسبولات وسى جاعدايعا قاتىستى تومەندەگىدەي جازبا جاريالاعان ەدى.
- ەندى قوعامدى ءدۇر سىلكىندىرگەن جاعدايدى جاريا ەتكەن ادۆوكاتقا قىسىم جاسالىپ جاتىر ەكەن. بۇل جەردە ادۆوكاتتىڭ ءسوزى راس پا، جوق پا، ونى انىقتاۋدىڭ ءبىر-اق جولى بار: سول اسكەري بولىمدە سۋيتسيد تىركەلگەن كەزدە قىزمەت ەتكەندەردىڭ، اسكەري بورىش وتەگەندەردىڭ بيوماتەريالدارىن الىپ، زەرتتەۋ جۇرگىزۋ. بىراق ادۆوكاتتىڭ ءوزى “بۇعان رۇقسات بەرىلمەي وتىرعانىن” ايتىپ جۋرناليستەرگە ارقا سۇيەۋگە ءماجبۇر بولعان جوق پا؟ اسكەريلەر نەدەن قورقىپ وتىر؟ شىن ادىلەتتى قازاقستان ورنايتىن بولسا، ءبىر كۇندە ەلدىڭ شاشىن اعارتىپ، ەڭسەسىن تۇسىرگەن ءىس بويىنشا ءادىل تەرگەۋ جۇرگىزىلۋى كەرەك. قىلمىستىڭ وتەۋى - جازا! جازالانباسا، قىلمىس كوبەيەدى. قىلمىسقا توزۋگە بولمايدى. ەكس-دەپۋتاتتار بۇل ىسكە ءۇن قوسسا دەيمىز. سوت اشىق جانە جاريالى ءوتۋى ءتيىس. ازعىندىقتى تىيۋ كەرەك، - دەدى اۆتور ادام بويىنداعى ەڭ ىزگى قاسيەتتەر ار مەن ۇياتتى العا تارتىپ.
دەگەنمەن قىلمىستىق قۋدالاۋ ورگاندارى ادۆوكاتتى كاسىبي ەتيكا نورمالارىن بۇزدى دەپ ايىپتايدى جانە قىزمەتتىك تەرگەۋ جۇرگىزۋدى سۇراعان. قازىردە ولاردىڭ ءوتىنىشى قر ادىلەت مينيسترلىگىنە جولداندى.
“ادىرنا” ۇلتتىق پورتالى
