رەسەيلىك سيبۋر حولدينگى «قازمۇنايگاز» ۇك اق-نان «Polimer Production» جشس-ءنىڭ 60% اكتسياسىن ساتىپ الدى. بۇل تۋرالى قر مۇناي-گاز حيمياسى قاۋىمداستىعى جاريالادى، دەپ حابارلايدى “ادىرنا” ۇلتتىق پورتالى.
سيبۋر - رەسەيدەگى ءىرى ينتەگراتسيالانعان مۇناي-گاز حيمياسى كومپانيالارىنىڭ ءبىرى.
مالىمەتكە سايكەس، «Polimer Production» جشس 2012 جىلى اتىراۋ وبلىسىندا پوليمەر ونىمدەرىن ءوندىرۋ جوباسىن ىسكە اسىرۋ ماقساتىندا قۇرىلعان. زاۋىت 2015 جىلى پايدالانۋعا بەرىلگەن.
2022 جىلعى 31 جەلتوقسانداعى ەسەپكە سايكەس، Polimer Production جشس-ءنىڭ شوعىرلانعان شىعىنى 27,59 ملرد تەڭگەنى قۇراپ، كاپيتالىنىڭ تاپشىلىعى 6,02 ملرد تەڭگە بولعان. مىندەتتەمەلەرى – 12,1 ملرد تەڭگە، ونىڭ ىشىندە 11,05 ملرد تەڭگە «سامۇرىق-قازىنا وڭدەۋ» ۇيىمىنان الىنعان قارىزدار. بۇدان بولەك، كومپانيا 2022 جىلى 1,19 ملرد تەڭگە، ال 2021 جىلى 793 ملن تەڭگە كولەمىندە قارجىلاي كومەك العان. سونداي-اق، 2022 جىلى جارعىلىق كاپيتالىنا 3,3 ملرد تەڭگە قۇيىلعان.
2023 جىلدىڭ جەلتوقسانىندا Polimer Production كومپانياسىنىڭ جارعىلىق كاپيتالىنىڭ 100%-ى بۇرىنعى يەلەرىنەن – «سامۇرىق-قازىنا وڭدەۋ» جشس (99,9%) جانە «تاراز حيميالىق پاركى» اەا باسقارۋشى كومپانياسىنان (0,1%) «قازمۇنايگاز» ۇك اق-عا ءوتتى. بۇل مامىلە ۇلتتىق كومپانيانىڭ مۇناي-گاز حيميا اكتيۆتەرىن شوعىرلاندىرۋ جۇمىستارىنىڭ جالعاسى رەتىندە سيپاتتالعان.
Polimer Production-نىڭ نەگىزگى قىزمەتى – «KPI» جشس-ءنىڭ ينتەگراتسيالانعان گاز-حيميا كەشەنىندە وندىرىلەتىن پوليپروپيلەننەن پوليمەر ونىمدەرىن شىعارۋ. KPI كومپانياسىن «قازمۇنايگاز» باسقارادى، سول سەبەپتى Polimer Production كومپانياسىنىڭ ۇلتتىق كومپانيا پايداسىنا بەرىلۋى اتىراۋ وبلىسىنداعى بىرىڭعاي گاز-حيميا كەشەنى اياسىندا جوبالاردىڭ سينەرگياسىن قامتاماسىز ەتەدى دەلىنگەن اقپاراتتا.
2023 جىلدىڭ جەلتوقسانىندا قاتىسۋشىنىڭ وزگەرۋىنە بايلانىستى Polimer Production مەملەكەتتىك قايتا تىركەۋدەن ءوتتى.
