كەشە رەسمي تۇردە "جاستار جىلىنىڭ" اشىلۋى بولدى. جاستار جىلى جاستارعا نە بەرەدى؟ قانداي ماسەلەنى شەشە الامىز؟ وسى سۇراقتاردى بەلگىلى ساياساتتانۋشى راسۋل جۇمالىعا قويعان ەدىك.
-جاستار جىلىنان نە كۇتەسىز؟
-جاستار جىلى ناۋقانشىلدىققا بوي الدىرماي، ناقتى ىستەر جىلى بولسا. جاستارعا قاتىستى جوبالاردىڭ ىسكە اسۋىمەن ەرەكشەلەنسە. سەبەبى، وسىعان دەيىنگى جىلدار بىزدە ءارتۇرلى اتالدى. قارتتار جىلى بولدى. ءۇش جىل قاتارىنان "اۋىل جىلى" دەپ اتالدى. سول ناۋقانشىلدىقتان باس كوتەرمەي فورمالدى ءبىر ءىس-ارەكەتتەر ورىن الدى. مىسالى، سول ءۇش جىلدا اۋىل دامىپ، وركەندەۋدىڭ ورنىنا ودان ءارى قيراپ، ودان ءارى تاس-تالقانى شىقتى. وسى 2019 جىل الدىڭعى اتى بار دا زاتى جوق جىلداردىڭ قاتەلىگىن قايتالاماسا دەيمىز.
-قايتالاماۋ ءۇشىن نە ىستەۋ كەرەك؟
-نەگىزگى ءۇمىت جاستار جىلى سالتاناتتى فورۋمدار اياسىندا شەكتەلىپ، جاعىمپازدىقتى ناسيحاتتاماسا ەكەن دەيمىز. بۇل ماسەلەنى شەشۋ جولى - جاستاردىڭ وزىمەن تىكەلەي بايلانىسقا شىعۋ. جاستاردىڭ قولىنا مۇمكىندىكتەردى بەرۋ. لاۋازىمدار، ۇيىمداستىرۋشىلىق مۇمكىندىكتەر، قارجىلىق قولداۋ. بۇلاردىڭ بارلىعى شەندىلەردىڭ قولىندا قالا بەرسە الدىڭعى تاجىريبە كورسەتكەندەي قۇر ناۋقان بولىپ قالا بەرەدى دەگەن قورقىنىش بار. قوعامدىق ۇيىمدار، ازاماتتىق قوعام وكىلدەرى مەن جاستاردىڭ بىرلەستىكتەرىنىڭ قولىنا مۇمكىندىك بەرىپ كورەيىك. سەبەبى، وسىعان دەيىنگى جۇمىستاردى بيلىك ءوزى جۇرگىزگەندە اياعى نەمەن تىنعانى بەلگىلى.
جاستاردىڭ اراسىنداعى باستى ماسەلە دەپ نەنى اتار ەدىڭىز؟
-جاستاردىڭ اراسىندا قيىندىقتار وتە كوپ. جاستاردىڭ رۋحانياتى، جۇمىسپەن قامتىلۋى، جوعارى ءبىلىمىنىڭ قول جەتىمدىلىگى، جوعارى وقۋ ورىندارىنىڭ جەمقورلىقتان ادا بولىپ، ساپالى ءبىلىم بەرۋى، ديپلومحاناعا اينالماي، كىشىگىرىم قالالار مەن اۋىل جاستارىنىڭ اراسىنداعى ماسەلەلەر، جاستاردىڭ شەتەلگە كەتۋى، اسىرەسە، ءبىلىمدى جاستاردىڭ، قولىنان ءىس كەلەتىندەرىنىڭ قازاقستاننان تىسقارى كەتۋى، كەرىتارتپا ءدىني اعىمدارعا شىرمالعاندار، جىلدار بويى قوردالانعان بۇل ماسەلەلەردى شەشۋ ءۇشىن ءبىر جىل ەمەس، 5-10 جىلدىق كەشەندى باعدارلاما قابىلدانىپ، ازاماتتىق قوعام ءوزى مۇرىندىق بولۋى ءتيىس. بىزدەگى ەڭ باستى ماسەلە جەمقورلىق. جاستار مەكتەپ پەن جوعارى وقۋ ورىندارىندا "ۇيادا نە كورسەڭ ۇشقاندا سونى ىلەسىڭ" دەيدى عوي، ولار دا الدىڭعى بۋىننان كورگەنىن قايتالايدى. سوندا كىنالى كىم؟ جاستار ما الدە، ۇلكەن بۋىن با؟
-كەشە جاستار جىلىنىڭ اشىلۋىندا ەلباسىنىڭ قاسىندا "جاس وتان" مەن بيلىكتىڭ قاناتىنداعى جاستار عانا بولدى. قوعامنىڭ ءۇنى جەتپەدى. جاستاردىڭ اراسىنان 1-2 بولماسا ءبارى ورىسشا سويلەدى دەگەن نارازىلىق تا الەۋمەتتىك جەلىدە جەلدەي ەستى..
-وتە ورىندى سىني پىكىرلەر مەن مالىمدەمەلەر. ايتىپ وتكەنىمىزدەي ناۋقانشىلدىققا اينالدىرامىز. حالىقتىڭ جايىن ويلايتىن باعدارلامالار قابىلدانادى. اقىر اياعىندا ول ءوشىپ تىنادى، نەمەسە ول اقشا جوق بولىپ شىعادى. جاستارعا اينالعان تۇرعىن ءۇي كەشەندەرى مەن جاتاحقانالار سالىندى دەلىك. ءىس جۇزىندە بيلىككە جاقىنداردىڭ قولىنا كوشەدى، جاتاقحانالار جەكەشەلەنەدى. بۇنى حالىقتىڭ ءبارى كورىپ وتىر. بولاشاقتا بارلىق قوزعالىس پەن ۇيىمداردىڭ وكىلدەرىن شاقىرۋ كەرەك. ەڭ ۇلكەن جاۋاپكەرشىلىك پەن مىندەت مەملەكەتتىڭ موينىندا. سەبەبى، بارلىق رەسۋرس بيلىكتىڭ قولىندا.
-بىزدەگى "جۇلدىزدار" مەن تانىمال سپورتشىلار بولسىن، ەل تانيتىن جاستاردان قوعامعا بايلانىستى ساۋال قويساڭىز "مەنىڭ ساياساتتا شارۋام جوق" دەيدى. بىراق، وسىنداي كەزدەسۋلەر مەن ماراپراتتاۋلاردىڭ ورتاسىندا سولار جۇرەدى. نەگە؟
-بۇل ەكىجۇزدىلىك. جالپى، بىزدە ءبارى ەكىجۇزدىلىككە قۇرالادى. بيلىكتىڭ باسى قاسىنداعىلار مەن قاراپايىم حالىقتىڭ ءومىر ءسۇرۋ ورتاسى ەكى بولەك پلانەتادا. كوشەگە شىقساڭىز داعدارىس، باعالاردىڭ شارىقتاۋى، جۇمىسسىزدىق، ۇرلىق-قارلىق، قىلمىستىڭ ءورشۋى. تەلەديداردان مۇلدە باسقا قازاقستان. كەشەگىدەي فورۋمداردا ماقتاپ-ماداقتاۋ. جاعىمپازدىق.
ءبىز جاستارعا يە بولۋىمىز كەرەك. جۇمىسسىز، اشىنعان جاستاردىڭ سالدارى قانداي بولاتىنىن كەشەگى "اراب كوكتەمى" مەن بۇگىنگى ۆەنەسۋەلا كورسەتتى.
اڭگىمەڭىزگە راحمەت!
"ادىرنا" ۇلتتىق پورتالى
