«اق جول» دەموكراتيالىق پارتياسى ۇلتتىق كەڭەسى مالىمدەمە جاسادى، دەپ جازادى "ادىرنا" ۇلتتىق پورتالى.
- «اق جول» دەموكراتيالىق پارتياسى مەملەكەت باسشىسىنىڭ پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋىن وتكىزۋ تۋرالى شەشىمىن قولدايدى. بۇل سايلاۋ رەسپۋبليكانىڭ جاڭا ساياسي جۇيەسىنىڭ قالىپتاسۋىن ءتامامداپ، بيلىكتىڭ زاڭ شىعارۋ تارماعىندا قوعامنىڭ كەڭ وكىلدىگىن قامتاماسىز ەتۋگە ءتيىس. وسىلايشا، مەملەكەتتىك باسقارۋ ينستيتۋتتارى پرەزيدەنت ق.توقاەۆ ۇسىنعان جانە 2022 جىلعى 5 ماۋسىمدا جالپىحالىقتىق رەفەرەندۋمدا قابىلدانعان كونستيتۋتسيانىڭ جاڭا رەداكتسياسىنا تولىعىمەن سايكەستەندىرىلدى. «اق جول» دەمپارتياسى كاسىپكەرلىك مۇددەسىن قورعاپ، الاشوردانىڭ زياتكەرلىك مۇراسىنا سۇيەنە وتىرىپ، ەكونوميكا مەن قوعامداعى ليبەرالدى قايتا قۇرۋلاردى تاباندىلىقپەن جاقتاپ، جەمقورلىق پەن ادىلەتسىزدىكتى باتىل اشكەرەلەپ، نارىقتىق رەفورمالاردى ۇسىنىپ، العا جىلجىتۋدا. ءبىز شاعىن جانە ورتا بيزنەستىڭ، وتاندىق تاۋار وندىرۋشىلەردىڭ، ءوزىن-ءوزى قامتاماسىز ەتەتىن زيالى قاۋىم مەن تابىستى جاستار تۇرىندەگى ورتا تاپتىڭ قالىپتاسۋى مەن كەڭەيۋىنە تالماي جاردەمدەسۋدەمىز.
ءوزىنىڭ 20 جىلدان استام تاريحىندا، سوڭعى ءۇش پارلامەنتتىك ناۋقاندا پارتيامىز ماجىلىستە جانە بارلىق دەڭگەيدەگى ءماسليحاتتاردا فراكتسيالار قۇرا وتىرىپ، سايلاۋشىلاردىڭ ارتىپ كەلە جاتقان قولداۋىنا تۇراقتى تۇردە يە بولىپ ءجۇر. سوڭعى ءۇش جىلدا پارتيانىڭ باستامالارى مەن ساياسي باعدارلاماسى، بيۋروكراتيا مەن وپپونەنتتەردىڭ قارسىلىعىنا قاراماستان كەزەڭ-كەزەڭىمەن جۇزەگە اسىرىلىپ كەلەدى. بۇل مەملەكەتتىك جۇيەدە بولىپ جاتقان وزگەرىستەردىڭ، ءبىزدىڭ ساياسي ۇسىنىستارىمىزدىڭ وزەكتىلىگى مەن «اق جول» پارتياسىنىڭ قازىرگى قازاقستاننىڭ ماڭىزدى ساياسي كۇشى رەتىندە قاجەتتىلىگىنىڭ ناتيجەسى. «اق جول» دەموكراتيالىق پارتياسى ءوز سايلاۋشىلارىنىڭ مۇددەسىن قورعاپ، جاڭا جانە ءادىل قازاقستاندى قۇرۋعا لايىقتى ۇلەس قوسۋ ماقساتىندا پرەزيدەنت جاريالاعان بارلىق دەڭگەيدەگى وكىلدى ورگاندارعا سايلاۋعا بارىنشا ارەكەتتەسىپ قاتىسادى. بۇل سايلاۋ مەملەكەتىمىزدىڭ، ءاربىر قازاقستاندىق وتباسىنىڭ تاعدىرىنداعى تەرەڭ دە تۇبەگەيلى وزگەرىستەردىڭ باستاۋى بولۋى كەرەك دەپ ەسەپتەيمىز. اق جول، قازاقستان!، - دەلىنگەن مالىمدەمەدە.
"ادىرنا" ۇلتتىق پورتالى
