تۇراربەك قۇسايىن ءوزىن "زيناقور" دەپ ايىپتاعان التىنبەك اجوكۇلىنا جاۋاپ بەرىپ، "شىندىعىندا مەشىتتەگى يمام-مولدالاردىڭ وڭىپ تۇرعانى جوق. يمامدىق قىزمەت وسىلاي ەكەن دەپ ۇلكەن مولدالاردان ۇلگى الدىم. يمام بولىپ جۇرگەندە ماعان جامان ادەت ۇلكەن يمامداردان جۇقتى" دەپ مالىمدەمە جاسادى. بۇل تۋرالى "ادىرنا" ۇلتتىق پورتالى جازادى.
"مەن ءبىر مانداتتى وكرۋگتەن ءوز كانديداتۋرامدى ءماجىلىس دەپۋتاتتىعىنا ۇسىناتىنىم جونىندە قوعام حاباردار بولعان سوڭ، ماعان قارسى ءمۇفتيات تاراپىنان قارالاۋ باستالدى. راس، مەن باس ءمۇفتي ناۋرىزباي تاعانۇلىنىڭ العان ءبىلىمىن انىقتاپ بەرۋ جونىدە ءبىلىم مينيسترلىگىنە حات جولداعام. ناۋرىزباي قاجىنىڭ قۇراندى قاتە وقيتىنى جانە اراب ءتىلىن بىلمەيتىنى تۋرالى يسلامتانۋشى اسقار سابدين بۇقارالىق اقپارات قۇرالدارىندا تالاي رەت ايتتى. سوعان بايلانىستى ناۋرىزباي تاعانۇلىنىڭ باس ءمۇفتي بولۋعا قۇزىرەتى جوعىن ايتقام. وسىنداي دالەلدى سىننان كەيىن باس ءمۇفتي ءوزىنىڭ قاراماعىنداعى يمامداردى ماعان قارسى ايداپ سالدى. اتىراۋدا تۇراتىن يمام التىنبەك اجوكۇلى مەنى "زيناقور" دەپ ايىپتادى، قۇسپان مولدا مەشىتىندە يمام بولىپ جۇرگەندە مەشىتكە كەلگەن قىز-كەلىنشەكتەردى ازعىردى دەدى. التىنبەك يمامنىڭ ايىپتاۋىنا بايلانىستى مىنا جاعدايدى ايتقىم كەلەدى: التىنبەكپەن مەدرەسەدە بىرگە وقىعانىم، قۇسپان مولدا جانە يمانعالي مەشىتىندە بىرگە جۇمىس ىستەگەنىم راس. بىراق ول مەشىتكە كەلگەن قىز-كەلىنشەكتەردى مەن عانا ازعىرعانىمدى، مەن عانا زيناقور ەكەنىمدى ايتادى. شىندىعى قالاي؟ شىندىعىندا مەشىتتەگى يمام-مولدالاردىڭ وڭىپ تۇرعانى جوق. مەن ول كەزدە وڭ-سولىمدى تانىماعان جاپ-جاس ءدىن قىزمەتكەرى بولدىم. يمامدىق قىزمەت وسىلاي ەكەن دەپ ۇلكەن مولدالاردان ۇلگى الدىم. سولاردىڭ ىستەگەنىن مەن دە ىستەدىم. مولدانىڭ ىستەگەنىن ىستەمە، ايتقانىن ىستە دەگەن ءتامسىلدى ول كەزدە تۇسىنگەن جوقپىن. يمام بولىپ جۇرگەندە ماعان جامان ادەت ۇلكەن يمامداردان جۇققانىن تاعى دا قايتالاپ ايتام", - دەيدى تۇراربەك قۇسايىن.
ونىڭ ايتۋىنشا، اتا-بابا ءداستۇرىن ۇستاناتىن قازاقتاردى "جاۋ" سانايتىن يمام-مولدالار ونى ارنايى تاپسىرىسپەن قارالاپ وتىر.
"كەيىن مولدالاردىڭ كىر-لاس تىرلىگىن كورگەن سوڭ مەشىتتەن جەرىدىم، يمامدىقتان جيىركەندىم. سوندىقتان دا تازالىق پەن ادامگەرشىلىكتەن جۇرداي ءمۇفتياتتان كەتتىم. بۇل جونىندە ءوزىمنىڭ ومىرباياندىق «مەن قالاي رۋحاني جاڭعىردىم» دەگەن كىتابىمدا جازعانمىن. يمام بولعانىما وتە قاتتى وكىنەتىنىمدى دە جانە بۇدان كەيىن ۇجىمدىق ءدىن بولىپ سانالاتىن اراب-پارسى فولكلورىنا قاراي اياق باسپايتىنىمدى دا ايتقان ەدىم. ال مۇفتياتتاعى ارسىز ءىس-ارەكەتتەر مەن ءۇشىن دە، باسقالار ءۇشىن دە جاڭالىق ەمەس. ول جەردەگى ازعىندىق بۇرىن دا بولعان قازىر دە بار، ءمۇفتياتتا تۇبەگەيلى رەفورما جاسالماسا،بۇنداي سوراقىلىقتار كەلەشەكتە دە بولا بەرەدى. ايتپاقشى ءدىني باسقارما باس ءمۇفتيدىڭ تاپسىرماسىمەن قازاقي دۇنيە تانىمدى ۇستاناتىن قازاقستان ازاماتتارىنا قارسى ناۋقان باستادى. اتاپ ايتقاندا قمدب زايىرلى قازاقتاردى كاپىر ساناتىنا قوسىپ،ساق-عۇن نەمەسە اتاقتى ۇلى قاعاندارىمىزدىڭ تانىم-فيلوسوفياسىن ناسيحاتتايتىن ازاماتتاردى ءبولىپ-جارىپ،قازاق قوعامىنا قۇبىجىق قىلىپ كورسەتۋدە. وسىعان وراي زايىرلى قازاقتار اتا زاڭىمىزدى اياقاستى ەتكەن ءمۇفتياتتى سوتقا بەرگەن-ءدى. راس، مەن دە تالاي جىل اداسىپ، ءتۇرلى سەكتالاردىڭ رۋحاني قىسىمىنا ۇشىراپ، ءتۇپ قازىعىمدى ەندى عانا تاپقان اداممىن. ناقتى ايتسام مەن قازاقي دۇنيەتانىمداعى زايىرلى،ليبەرال-دەموكرات قازاقپىن. اتا-بابا ءداستۇرىن ۇستاناتىن زايىرلى قازاقتاردى جاۋىنداي كورەتىن ءمۇفتيات، ءوزىنىڭ يمام-مولدالارىنا مەنى زايىرلى كوزقاراسىم ءۇشىن تاپسىرىس بەرىپ، قارالاپ جاتىر. اتىراۋلىق نۇر-مۇباراك ۋنيۆەرسيتەتىنىڭ تۇلەگى التىنبەك اجوكۇلى دا سولاردىڭ تاپسىرماسىمەن ارەكەت ەتىپ جاتقانىنا ءشۇبا جوق", - دەيدى ول.
وسىعان بايلانىستى تۇراربەك قۇسايىن كەلەسىدەي مالىمدەمە جاسادى.
"زايىرلى پرينتسيپتەرگە نەگىزدەلگەن قازاقي-تۇركىلىك دۇنيە تانىمدى ءوزىمنىڭ رۋحاني ۇستانىمىم دەپ تاڭدادىم. اتا زاڭدا جازىلعان مەنىڭ نانىم-سەنىمىمدى قورلاۋعا ءمۇفتياتتىڭ قاقىسى جوق. قانداي قىسىم جاساسا دا مەن ساياسيلانعان ارابي-پارسى سۋبمادينەتىنە ەشقاشان ورالمايتىنىمدى، قازاق حالقىنىڭ ءداستۇرلى تاريحي مۇراسىنا بەرىك،ياعني مونوتەيستىك ءتاڭىر فيلوسوفيالىق ۇستانىمىندا قالاتىنىمدى ەسكەرتەمىن. اتا زاڭعا سايكەس مەنىڭ دە سايلاۋ قۇقىم، سايلانۋعا قاقىم بار. ءمۇفتيات مەنىڭ ساياسي قۇقىعىما كەدەرگى جاساپ، اياعىمنان شالىپ قۇلاتقىسى كەلەدى. بىراق مەن كوپتەگەن كەدەرگىگە قاراماي ءماجىلىس دەپۋتاتتىعىنا ءوزىمنىڭ كانديداتۋرامدى ۇسىنام. مەنىڭ تاعدىرىمدى، دەپۋتات بولار-بولماسىمدى دىنشىلدەر ەمەس، ساياسي ساناسى بار قازاق حالقى شەشەدى. حالقىم قولداپ ماجىلىسكە دەپۋتاتتىققا وتسەم ۇلتتىق قازاقي دۇنيەتانىمدى مەملەكەت تۇرعىسىنان ناسيحاتتاۋدى جانە قازاق ەلىنىڭ زايىرلىلىق پرينتسيپتەرىنىڭ قاتاڭ ساقتالۋىنا ادال قىزمەت ەتەمىن دەپ ۋادە بەرەمىن", - دەپ تۇيىندەدى ءسوزىن تۇراربەك قۇسايىن.
"ادىرنا" ۇلتتىق پورتالى
