قازاقستان مەن يران مينيسترلىكتەرى ءسۇتتى تەرەڭ وڭدەۋ جوباسىنا ينۆەستيتسيا سالۋ تۋرالى كەلىسىمگە قول قويدى، دەپ حابارلايدى "ادىرنا" ۇلتتىق پورتالى.
اۋىل شارۋاشىلىعى مينيسترلىگىنىڭ مالىمەتىنشە، الماتى وبلىسىندا جىلىنا 155 مىڭ توننا ءونىم وندىرەتىن ىرىمشىك زاۋىتى بوي كوتەرەدى. جوبانىڭ جالپى ينۆەستيتسيا كولەمى 35,2 ميلليارد تەڭگەنى قۇرايدى. قازىرگى ۋاقىتتا قۇرىلىس-مونتاج جۇمىستارى باستالىپ كەتكەن.
مينيستر ايداربەك ساپاروۆ اۋىل شارۋاشىلىعى ونىمدەرىن وڭدەۋ سالاسىنا ستراتەگيالىق ينۆەستورلاردى تارتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى. ونىڭ ايتۋىنشا، جاڭا كاسىپورىن ەلدەگى وڭدەۋ قۋاتىن ارتتىرىپ، وتاندىق ءسۇت وندىرۋشىلەر ءۇشىن تۇراقتى وتكىزۋ نارىعىن قالىپتاستىرۋعا مۇمكىندىك بەرەدى.
ءوز كەزەگىندە Solico Group پرەزيدەنتى گولام ءالي سۇلەيماني قازاقستاندى ۇزاق مەرزىمدى ستراتەگيالىق سەرىكتەس رەتىندە قاراستىراتىنىن ايتتى. سونداي-اق كومپانيا كارتوپتى وڭدەۋ جانە بالالار تاعامىن ءوندىرۋ باعىتىندا دا جاڭا جوبالاردى ىسكە اسىرۋ مۇمكىندىگىن زەرتتەپ جاتىر. كەلىسىم اياسىندا ينۆەستورعا ءوندىرىس الاڭىنا قاجەتتى ينجەنەرلىك ينفراقۇرىلىمدى جەتكىزۋدى قوسا العاندا، مەملەكەتتىك قولداۋ شارالارى ۇسىنىلادى.
زاۋىتتى 2029 جىلى پايدالانۋعا بەرۋ جوسپارلانعان. جوبا اياسىندا كەمىندە 400 تۇراقتى جۇمىس ورنى اشىلىپ، قازاقستاندىق ماماندار وقىتىلىپ، زاماناۋي وندىرىستىك تەحنولوگيالار ەنگىزىلەدى. بۇدان بولەك، 2028–2038 جىلدار ارالىعىندا كومپانيا الماتى وبلىسىنداعى الەۋمەتتىك باستامالار مەن جەرگىلىكتى قاۋىمداستىقتاردى قولداۋعا جىل سايىن شامامەن 50 ميلليون تەڭگە ءبولۋدى جوسپارلاپ وتىر.
