Turarbek Qusaıyn ózin "zınaqor" dep aıyptaǵan Altynbek Ajokulyna jaýap berip, "Shyndyǵynda meshittegi ımam-moldalardyń ońyp turǵany joq. Imamdyq qyzmet osylaı eken dep úlken moldalardan úlgi aldym. Imam bolyp júrgende maǵan jaman ádet úlken ımamdardan juqty" dep málimdeme jasady. Bul týraly "Adyrna" ulttyq portaly jazady.
"Men bir mandatty okrýgten óz kandıdatýramdy Májilis depýtattyǵyna usynatynym jóninde qoǵam habardar bolǵan soń, maǵan qarsy múftııat tarapynan qaralaý bastaldy. Ras, men bas múftı Naýryzbaı Taǵanulynyń alǵan bilimin anyqtap berý jónide Bilim mınıstrligine hat joldaǵam. Naýryzbaı qajynyń Qurandy qate oqıtyny jáne arab tilin bilmeıtini týraly ıslamtanýshy Asqar Sabdın buqaralyq aqparat quraldarynda talaı ret aıtty. Soǵan baılanysty Naýryzbaı Taǵanulynyń Bas múftı bolýǵa quzireti joǵyn aıtqam. Osyndaı dáleldi synnan keıin Bas múftı óziniń qaramaǵyndaǵy ımamdardy maǵan qarsy aıdap saldy. Atyraýda turatyn ımam Altynbek Ajokuly meni "zınaqor" dep aıyptady, Quspan molda meshitinde ımam bolyp júrgende meshitke kelgen qyz-kelinshekterdi azǵyrdy dedi. Altynbek ımamnyń aıyptaýyna baılanysty myna jaǵdaıdy aıtqym keledi: Altynbekpen medresede birge oqyǵanym, Quspan molda jáne Imanǵalı meshitinde birge jumys istegenim ras. Biraq ol meshitke kelgen qyz-kelinshekterdi men ǵana azǵyrǵanymdy, men ǵana zınaqor ekenimdi aıtady. Shyndyǵy qalaı? Shyndyǵynda meshittegi ımam-moldalardyń ońyp turǵany joq. Men ol kezde oń-solymdy tanymaǵan jap-jas din qyzmetkeri boldym. Imamdyq qyzmet osylaı eken dep úlken moldalardan úlgi aldym. Solardyń istegenin men de istedim. Moldanyń istegenin isteme, aıtqanyn iste degen támsildi ol kezde túsingen joqpyn. Imam bolyp júrgende maǵan jaman ádet úlken ımamdardan juqqanyn taǵy da qaıtalap aıtam", - deıdi Turarbek Qusaıyn.
Onyń aıtýynsha, ata-baba dástúrin ustanatyn qazaqtardy "jaý" sanaıtyn ımam-moldalar ony arnaıy tapsyryspen qaralap otyr.
"Keıin moldalardyń kir-las tirligin kórgen soń meshitten jeridim, ımamdyqtan jıirkendim. Sondyqtan da tazalyq pen adamgershilikten jurdaı múftııattan kettim. Bul jóninde ózimniń ómirbaıandyq «Men qalaı rýhanı jańǵyrdym» degen kitabymda jazǵanmyn. Imam bolǵanyma óte qatty ókinetinimdi de jáne budan keıin ujymdyq din bolyp sanalatyn arab-parsy folkloryna qaraı aıaq baspaıtynymdy da aıtqan edim. Al múftııattaǵy arsyz is-áreketter men úshin de, basqalar úshin de jańalyq emes. Ol jerdegi azǵyndyq buryn da bolǵan qazir de bar, múftııatta túbegeıli reforma jasalmasa,bundaı soraqylyqtar keleshekte de bola beredi. Aıtpaqshy dinı basqarma Bas múftıdiń tapsyrmasymen qazaqı dúnıe tanymdy ustanatyn Qazaqstan azamattaryna qarsy naýqan bastady. Atap aıtqanda QMDB zaıyrly qazaqtardy kápir sanatyna qosyp,saq-ǵun nemese ataqty uly qaǵandarymyzdyń tanym-fılosofııasyn nasıhattaıtyn azamattardy bólip-jaryp,qazaq qoǵamyna qubyjyq qylyp kórsetýde. Osyǵan oraı zaıyrly qazaqtar Ata Zańymyzdy aıaqasty etken múftııatty sotqa bergen-di. Ras, men de talaı jyl adasyp, túrli sektalardyń rýhanı qysymyna ushyrap, túp qazyǵymdy endi ǵana tapqan adammyn. Naqty aıtsam men qazaqı dúnıetanymdaǵy zaıyrly,lıberal-demokrat qazaqpyn. Ata-baba dástúrin ustanatyn zaıyrly qazaqtardy jaýyndaı kóretin múftııat, óziniń ımam-moldalaryna meni zaıyrly kózqarasym úshin tapsyrys berip, qaralap jatyr. Atyraýlyq Nur-Mubarak ýnıversıtetiniń túlegi Altynbek Ajokuly da solardyń tapsyrmasymen áreket etip jatqanyna shúbá joq", - deıdi ol.
Osyǵan baılanysty Turarbek Qusaıyn kelesideı málimdeme jasady.
"Zaıyrly prınıpterge negizdelgen qazaqı-túrkilik dúnıe tanymdy ózimniń rýhanı ustanymym dep tańdadym. Ata zańda jazylǵan meniń nanym-senimimdi qorlaýǵa múftııattyń qaqysy joq. Qandaı qysym jasasa da men saıasılanǵan arabı-parsy sýbmádınetine eshqashan oralmaıtynymdy, qazaq halqynyń dástúrli tarıhı murasyna berik,ıaǵnı monoteıstik Táńir fılosofııalyq ustanymynda qalatynymdy eskertemin. Ata Zańǵa sáıkes meniń de saılaý quqym, saılanýǵa qaqym bar. Múftııat meniń saıası quqyǵyma kedergi jasap, aıaǵymnan shalyp qulatqysy keledi. Biraq men kóptegen kedergige qaramaı Májilis depýtattyǵyna ózimniń kandıdatýramdy usynam. Meniń taǵdyrymdy, depýtat bolar-bolmasymdy dinshilder emes, saıası sanasy bar qazaq halqy sheshedi. Halqym qoldap májiliske depýtattyqqa ótsem ulttyq qazaqı dúnıetanymdy memleket turǵysynan nasıhattaýdy jáne Qazaq eliniń zaıyrlylyq prınıpteriniń qatań saqtalýyna adal qyzmet etemin dep ýáde beremin", - dep túıindedi sózin Turarbek Qusaıyn.
"Adyrna" ulttyq portaly
