اقش-تىڭ لەيك-پلەسيد قالاسىندا بۇكىل الەم كوز تىككەن دۇنيەجۇزىلىك ۋنيۆەرسيادا ءوتىپ جاتىر. ەلىمىزدىڭ ۇكىلەگەن ءۇمىتىن ارقالاعان سپورتشىلارىمىز وتە جاقسى ناتيجە كورسەتىپ كەلەدى. قورجىنىمىزدا ازىرگە 3 التىن، 1 قولا. بۇل ۇلكەن جەتىستىك. ويتكەنى كوماندالىق ەسەپ بويىنشا ۇزدىك ۇشتىكتىڭ قاتارىندامىز. مۇنداي ۇلكەن جەتىستىككە جەتۋىمىزگە ستۋدەنتتەر سپورتىنىڭ دامۋىنا ەرەكشە ىقىلاستىق تانىتقان قر عىلىم جانە جوعارى ءبىلىم مينيسترلىگى بىردەن-ءبىر سەبەپ بولدى. قازاقتا «جاقسىنىڭ جاقسىلىعىن ايت، نۇرى تاسسىن» دەگەن ءسوز بار.
شىنى كەرەك، بۇل ۋنيۆەرسياداعا قازاقستان ستۋدەنتتەرى قاتىسپاۋى دا مۇمكىن ەدى. ۇلكەن قيىندىقتار بولدى. الايدا قر عىلىم جانە جوعارى ءبىلىم ءمينيسترى ساياسات نۇربەكۇلىنىڭ تاباندىلىعىنىڭ ارقاسىندا قارجىلىق ماسەلەلەر تەز ارادا شەشىلىپ، ەش كەدەرگى مەن قيىندىقسىز سپورتشىلارىمىز امەريكاعا اتتاندى. التىننان القا تاعىنعان ستۋدەنت-سپورتشىلاردىڭ جەڭىسى – كۇللى قازاقتىڭ جەڭىسى. بۇكىل ەل بوپ قۋاندىق.
سپورتشىلاردى قولداۋ ءۇشىن مۇحيت اسىپ امەريكا قۇرلىعىنا بارعان قر عىلىم جانە جوعارى ءبىلىم مينيسترلىگى سپورتشىلارىمىزبەن بىرگە جارىس جولىندا ءجۇردى. ستۋدەنت-سپورتشىلارمەن كەزدەسۋ وتكىزدى. قر عىلىم جانە جوعارى ءبىلىم ءمينيسترى ساياسات نۇربەك: «ستۋدەنتتەر سپورتىن قولعا الىپ، دامىتۋ جولىندا كوپتەگەن جۇمىستار اتقارامىز. ستۋدەنتتەر ليگاسى، قر چەمپيوناتتارىن وتكىزەمىز. سپورت پەن ءبىلىمدى ۇشتاستىرعان ءار ستۋدەنتكە قولداۋ كورسەتەمىز»- دەدى. بۇل – سپورتشىلارىمىزعا ۇلكەن موتيۆاتسيا.
مەن قازاقستان ۇلتتىق ستۋدەنتتەر سپورت وداعىنىڭ اتىنان، ستۋدەنتتەردىڭ اتىنان وسىنداي ۇلكەن قولداۋ كورسەتىپ وتىرعان جاڭا قۇرىلعان قر عىلىم جانە جوعارى ءبىلىم مينيسترلىگىنە ۇلكەن العىسىمدى بىلدىرگىم كەلەدى.
ايتا كەتەيىك، دۇنيەجۇزىلىك ۋنيۆەرسيادا - وليمپيادادان كەيىنگى ەكىنشى رولگە يە ۇلكەن جارىس. ۋنيۆەرسيادادا اتوي سالىپ، ەل نامىسىن قورعاۋ – سپورتتى سەرىك ەتكەن ءار ستۋدەنتتىڭ ارمانى. ەلىمىز ءۇشىن بارىنشا تەر توككەن ءار ستۋدەنت-سپورتشىعا ساتتىلىك تىلەيمىن.
قايرات زاكيريانوۆ،
قازاقستان ۇلتتىق ستۋدەنتتەر سپورت وداعىنىڭ پرەزيدەنتى
