Tynysh ómir súrgiń kele me? Ósip-óngiń kele me? Onda óndiriske jolama! Bul pikirdi zańger Abzal Quspan jýrnalıst Nartaı Aralbaıulyna bergen suhbatynda aıtty, dep habarlaıdy “Adyrna” ulttyq portaly.
Zańgerdiń aıtýynsha, óndiriske jolaý - qaýip.
“Beısenbaevtyń isin alyp qaraıyqshy. Qyzylorda oblysynda amerıkandyq kompanııalarmen birigip, áınek zaýytyn salyp jatty. Mine, bitip, 90%-y qaldy dep jatqan kezde antıkor qylmystyq is qozǵaıdy. Búkil jumysty toqtatyp tastaıdy, is qujattaryn tartyp alady. Sosyn qylmystyq is sotqa deıin jetedi. El-jurt onyń detaldaryn bilmeıdi. Óıtkeni, sotta ne bolyp jatqany eshkimge qyzyq emes. Jýrnalıster de durys aqparat taratpaıdy. Bir-eki saıt aqparat taratsa, mynaý mınıstrdi aqtaıyn dep jatyr dep senimsizdik bildiredi.
Men de mınıstrdi qorǵaǵam joq. Biraq ondaǵan azamattar iske tartyldy, sonyń ishinde qurylysshylardyń múddesin qorǵadym. Biraq ana jerde otyryp anyq kózim jetti.
Ol amerıkandyq kompanııanyń óziniń tarapynan da aıtyldy: “Jaqsy is boldy, jaqsy sybaılas jemqorlyq bolsyn deıik, jaqsy birneshe aı is boldy, jaqsy tergeý júrgizildi. Biraq nege bizdiń jumysty toqtatasyzdar? Bul Qazaqstanǵa tıimsiz ǵoı”,- dep ashyq tekstpen aıtty. Ony Beısenbaev ta aıtyp jatyr: “Munyń saıası astary bar, Reseı tarapynan jasalyp jatqan qysym” dep.
Osyndaı isterdi kóp kórdim. Keńes alatyn kásipkerlerge aıtamyn: Tynysh ómir súrgiń kele me? Ósip-óngiń kele me? Onda óndiriske jolama! Alyp-satýmen júre ber. Memleketten aqsha alyp, qurylysyńdy júrgize ber. Biraq óndiriske jaqyndadyń boldy, Reseıden ártúrli jolmen qysym uıymdastyrady”, dedi Abzal Quspan.
