ۋكراينا قارۋلى كۇشتەرى رەسەيدىڭ اتىنان سوعىسقان قازاق جىگىتىن تۇتقىنعا الدى. بۇل تۋرالى كونستانتينكا Telegram-ارناسى ۆيدەو جاريالادى، دەپ حابارلايدى “ادىرنا” ۇلتتىق پورتالى.
ۋكراينا اسكەريلەرى ءبىر توپ رەسەيلىك ساربازدى تۇتقىنعا الدى. ۆيدەودا تۇتقىنداردىڭ ءبىرى قازاقستاننىڭ قازاعى ەكەنىن ايتادى.
“مۇندا قالاي كەلدىڭ؟” دەگەن سۇراققا ول “جۇمىسقا الدى”، دەپ جاۋاپ بەرەدى.
اقپارات بويىنشا، بۇكىل تمد ەلدەرىندە رەسەيلىك كومپانيالار ماريۋپولدەگى قۇرىلىس الاڭىنا جۇمىسشىلار جيناپ جاتىر ەكەن. بىراق ولاردى الداپ مايدانعا الىپ باراتىن كورىنەدى.
“تۇتقىننىڭ امان قالعانى نەمەسە قاماۋدا ەكەنى بەلگىسىز. ويتكەنى، ۋكرايندىقتار ءوز جەرىنە قارۋمەن كەلگەندەردىڭ بارلىعىن جويۋعا قۇقىلى”، دەلىنگەن حابارلامادا.
ايتا كەتەيىك، قازاقستان ازاماتتارىنىڭ باسقا ەلدەردەگى اسكەري قاقتىعىستارعا قاتىسۋى جالدامالىلىق رەتىندە قىلمىستىق باپپەن جازالاناتىندىقتان، قازاقستاننىڭ سىرتقى ىستەر مينيسترلىگى مۇنى شۇعىل تۇردە باقىلاۋعا الۋى كەرەك.
