بىرىككەن اراب امىرلىگىندە قازاقستاننان كەلگەن كاسىپكەرلەردىڭ «KIT Dubai» بيزنەس-قاۋىمداستىعىنىڭ تۇساۋى كەسىلدى. بۇل تۋرالى كاسىپكەر، قاۋىمداستىق باسشىسى جاندار سادىقوۆ مالىمدەدى. ۇيىم ماقساتى – دۋبايدا كاسىپ باستاعان قازاق كاسىپكەرلەرىنە قولداۋ كورسەتىپ، ىسكەرلىك ورتا قالىپتاستىرۋ. شاراعا قازاقستاندىق كاسىپكەرلەر مەن ءباا-دەگى قر ەلشىلىگىنىڭ وكىلدەرى قاتىستى.
جاندار سادىقوۆتىڭ ايتۋىنشا، قازىر دۋبايدا جۇمىس ىستەۋگە قازاقستاننان بارعان كاسىپكەرلەر كوپ.
«الايدا جەرگىلىكتى جەردىڭ بيزنەس زاڭدىلىقتارىن، نارىقتاعى باسەكەلەستىكتى بىلمەگەندىكتەن نەمەسە قولداۋ كورسەتەتىن ورتاسى بولماعاندىقتان ءىسىن جۇرگىزە الماي ەلگە قايتۋعا ءماجبۇر بولاتىندار كوپ. سول سەبەپتى، الدىمەن امىرلىكتەگى قازاق كاسىپكەرلەرىن ءبىر-بىرىمەن جاقىن تانىستىرىپ، ءتۇرلى ءىس-شارالار، ترەنينگتەر ۇيىمداستىرۋ ارقىلى بىرلىگىن ارتتىرۋعا، جاڭا سەرىكتەستەر تابۋعا سەپتەسۋگە كۇش سالعالى وتىرمىز. دۋبايداعى كەز كەلگەن كاسىپكەر، وتانداستارىمىز بىزدەن كومەك سۇراي الادى»،- دەيدى ول.
ايتا كەتەيىك، «KIT» بيزنەس قاۋىمداستىعى» زاڭدى تۇلعالار بىرلەستىگى قازىرگى ۋاقىتتا قازاقستاننىڭ التى قالاسىندا – استانا، الماتى، قاراعاندى، قوستاناي، شىمكەنتتە جۇمىس ىستەيدى. شەتەلدەگى ءبىرىنشى فيليالى دۋبايدا اشىلىپ وتىر. قاۋىمداستىق 2020 جىلى اتامەكەن كاسىپكەرلىك پالاتاسىنىڭ اككرەديتاتسياسىنان وتكەن.
