تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستاندا مەملەكەتتىك قىزمەتتەردى كورسەتۋدىڭ جاڭا تسيفرلىق پلاتفورماسىن ەنگىزۋ جوسپارلانعانىن ءتۇسىندىردى، - دەپ حابارلايدى "ادىرنا" ۇلتتىق پورتالىنىڭ ءتىلشىسى.
باعدات مۋسين ءوز ينستاگرام پاراقشاسىندا قازىر الەۋمەتتىك جەلىلەردە تۋىنداعان سۇراقتارعا تۇسىنىكتەمە بەرىپ، جاۋاپ بەرگىم كەلەدى - دەپ مالىمدەدى.
- بىرىنشىدەن، مەن اقپاراتتىق ۆاكۋمعا جانە بۇرىن ايتىلعان اقپاراتتىڭ دۇرىس تۇسىندىرىلمەۋىنە بايلانىستى پايدا بولعان ميفتەردى جويعىم كەلەدى. ءبىز eGov-تى رف-عا بەرمەيمىز! - دەپ جازدى باعدات مۋسين ءوز Instagram پاراقشاسىندا.
سونداي-اق، مينيستر "قازاقستاندىقتاردىڭ بارلىق دەرەكتەرى رەسەيگە قولجەتىمدى بولادى"دەگەن ۇراندى ورىنسىز دەپ اتادى.
- نەلىكتەن؟ بىرىنشىدەن، قازاقستاندا تاۋەلسىزدىك العالى بەرى كوپتەگەن كومپانيالار شەتەلدىك قۇرىلىمدا جۇمىس ىستەيدى، دەسە دە بۇل بارلىق ەلدەر ءبىز تۋرالى مالىمەتتەردى الا الادى دەگەن ءسوز ەمەس. ەلەكتروندىق ۇكىمەتكە كەلەتىن بولساق، بۇل جەردە بىرەۋ بىرەۋگە اقپارات بەرەدى دەگەن سۇراقتىڭ تۋىنداماۋى دا كەرەك. جالپى، "eGov.kz" نە ەكەنىن قىسقاشا تۇسىندىرەيىن", - دەپ جازدى باعدات مۋسين.
- eGov - بۇل بارلىق مەملەكەتتىك بازالارمەن قۇرسىم ارقىلى قوسىلعان "ۆيترينا" عانا. بۇل بازالارعا نەمەسە جۇيەلەرگە ەشكىم ەشقاشان قول جەتكىزە المايدى! وتكەن ايدا باستالعان تالداۋ قازاقستاندىق مەملەكەتتىك سەكتوردا 400 + اقپاراتتىق جۇيە بار ەكەنىن كورسەتتى. بۇل جىلجىمايتىن مۇلىك مەملەكەتتىك بازاسى سياقتى ءىرى بازالاردان باستاپ، وليمپيادا جۇلدەگەرلەرى تىركەلگەن شاعىن بازالارعا دەيىن، دەپ مالىمدەدى مينيستر.
قازاقستاننىڭ تسيفرلىق دامۋ ءمينيسترى اتاپ وتكەندەي، اعىمداعى كەزەڭدە ءبىزدىڭ مىندەتىمىز - ءارتۇرلى تەحنولوگيالاردا جازىلعان، كەيدە باعدارلاماشى ەتيكاسى مەن ەسكىرگەن قۇجاتتاماسىز جۇزدەگەن جۇيەلەردىڭ ورنىنا، بارلىق دەرەكتەر بىرىڭعاي پلاتفورمادا رەتتەلگەن جانە تۇسىنىكتى بولاتىن ونداعان جۇيەلەرگە ءوتۋ بولىپ تابىلادى.
- قازىر eGov-تى ميلليونداعان ەسكى قۇرىلعىلارمەن سالىستىرۋعا بولادى، ولاردىڭ ورنىندا ءبىز ساپالى زاماناۋي تەحنولوگيامەن جابدىقتالعان پلاتفورمانى ورناتقىمىز كەلەدى. بىز حالىق ءۇشىن دە، ەكونوميكا ءۇشىن دە بارىنشا وڭ ناتيجە الۋ ماقساتىندا تسيفرلاندىرۋدىڭ "قۇراقتالعان" مودەلىنەن تۇتاس پلاتفورمالىق مودەلىنە وتەتىن كەز كەلدى، - دەدى ول.
- IT سالاسىنداعى كەز كەلگەن شەشىم، اسىرەسە حالىقارالىق شەشىم كيبەر قالقان مەن ۇيىم ازاماتتارىنىڭ مۇددەلەرىن قورعاۋ جونىندەگى ۋاكىلەتتى ورگانداردىڭ ۇسىنىمىن ەسكەرە وتىرىپ قابىلدانادى. ءبىز قازاقستان تاراپى باعدارلامالىق قامتاماسىز ەتۋ مەن تەحنيكالىق قولداۋدى تالاپ ەتەتىن ۆەندور سياقتى بولۋى كەرەك دەگەن تالاپ قويىپ وتىرمىز. سبەر بارلىق قولجەتىمدىلىكتى بەرە وتىرىپ، بارلىق كومپونەنتتەردىڭ باستاپقى كودتارىن كورسەتەدى جانە بارلىعىن قازاقستانداعى سەرۆەرلەرگە ورنالاستىرادى دەپ كەلىستىك، - دەپ اتاپ ءوتتى ول.
سونىمەن قاتار، باعدات ءمۋسيننىڭ ايتۋىنشا، ۇكىمەت مەموراندۋمعا قول قويدى، ونىڭ اياسىندا باعالاۋ قۇنى شامامەن 500 ميلليون دوللاردى قۇرايتىن تسيفرلىق ترانسفورماتسيا مۇمكىندىگى قاراستىرىلۋدا.
- بۇل نە دەگەن ءسوز؟ بۇل اتالعان سومانىڭ ءبىر بولىگى جەرگىلىكتى IT-نارىققا ينۆەستيتسيالاناتىنىن بىلدىرەدى. قازاقستاندىق كومپانيالار بۇل اقشانى پلاتفورمالىق ءتاسىلدى ەنگىزۋ بويىنشا جۇمىس شەڭبەرىندە الادى. سومانىڭ باسقا بولىگى ينفراقۇرىلىمدىق شەشىمدەرگە ارنالعان. تەك ءۇشىنشى بولىگى - "سبەردەن" شەشىمدى ساتىپ الۋ بولىپ تابىلادى", - دەپ جازدى مينيستر.
ەسكە سالا كەتەيىك، بۇعان دەيىن باعدات مۋسين جاڭا تسيفرلىق پلاتفورمانى ەنگىزۋ ءۇشىن نەگە رەسەيلىك "سبەر" كومپانيالار توبى تاڭدالعانىن تۇسىندىرگەن ەدى. 3 قىركۇيەكتە قازاقستان پرەمەر-ءمينيسترى اسقار مامين مەن رەسەي سبەربانكىنىڭ باسقارما توراعاسى گەرمان گرەف قازاقستان رەسپۋبليكاسىنىڭ تسيفرلىق ترانسفورماتسياسى، تسيفرلاندىرۋدىڭ پلاتفورمالىق مودەلىنە جانە Data Driven Government تۇجىرىمداماسىنا كوشۋ جونىندەگى جوبالاردى ىسكە اسىرۋ سالاسىنداعى ىنتىماقتاستىق تۋرالى مەموراندۋمعا قول قويدى. قازاقستاندا مەملەكەتتىك قىزمەتتەر كورسەتۋ ءۇشىن "سبەر" كومپانيالار توبى ازىرلەگەن جاڭا تسيفرلىق پلاتفورما ەنگىزىلەدى دەپ بولجانۋدا.
"ادىرنا" ۇلتتىق پورتالى
