Almatyda belgili bıznesmen Qaırat Satybaldynyń burynǵy áıeli Gúlmıra Satybaldynyń isine qatysty sot bastaldy. Oǵan bıznesti reıderlik jolmen tartyp aldy jáne adam urlady degen aıyptar taǵylǵan, dep habarlaıdy "Adyrna" ulttyq portaly KTK telearnasyna silteme jasap.
Qaırat Satybaldynyń ózi de ótken jyly asa iri kólemde qarjy jymqyrǵany úshin 6 jyl jaza arqalaǵan. Aıyptalýshy oryndyǵynda Gúlmıra Satybaldynyń júrgizýshisi men kómekshisi de bar. Tergeý málimetinshe, olar eki kásipkerdi bopsalap, bıznestegi úlesterin óz atyna jazdyrǵan. Jábirlenýshiniń biri — Baıan Alagózovanyń kúıeýi Tursyn Alagózov. Al ekinshisi Aıgúl Mekeshovaǵa kúsh kórsetip mıllıard teńge turatyn kompanııasyn 375 myń teńgege satyp alǵan deıdi tergeýshiler. Keltirilgen shyǵyn kólemi 6 mlrd teńgeden asyp jyǵylady.
Biraq aıyptalýshy taraptyń advokattary Alagózov óz kompanııasyndaǵy úlesin eks-jubaıynyń atyna ótip ketpeý úshin qasaqana ózge adamǵa rásimdegenin alǵa tartýda. Sondyqtan isti bas prokýratýranyń tergeýine qaıtarylǵanyn qalaıdy.
Sondaı-aq zań talaptarynyń óreskel buzylǵanyn aıtqan advokattar sýdıadan bultartpaý sharasyn úıqamaqqa ózgertýdi jáne isti Astana qalasyna jiberýdi de surady. Sýdıa aıyptalýshyny qamaýdan bosatqan joq. Biraq qylmystyq is budan bylaı elordada qaralatyn boldy.
«Satybaldy Gúlmıra 2020 jyldyń maýsymynan qyrkúıek aıyna deıin Alagózovke moraldyq-psıhologııalyq qysym kórsetip, Galanz Bottlers AQ úlesiniń 45,25 paıyzyn óz atyna jazdyrtqan. Satybaldy Gúlmıra, Batyrshaev pen Ótebekov uıymdasyp, Mekeshovany Almaty oblysy Jandosov aýylyna kúshpen alyp ketken. Sosyn oǵan qoqan-loqqy men psıhologııalyq qysym kórsetip, aldyn ala daıyndalǵan qujattarǵa qol qoıdyrtqan», - dedi prokýror Akromat Muhtarov.
"Adyrna" ulttyq portaly
