Qazaqstan Býcha qalasyna ornatylǵan kıiz úıden eshqandaı másele kórmeıdi. Bul týraly Syrtqy ister mınıstrliginiń ókili Aıbek Smadııarov aıtty, dep habarlaıdy “Adyrna” ulttyq portaly.
Sondaı-aq, ol Býchadaǵy kıiz úı týraly Qazaqstan Reseı bıligine resmı túsinikteme bermeıtinin aıtty.
“Kıiz úı qoıyldy. Budan qandaı problema týyndady? Qoıyldy. Kómek kórsetildi. Bul jeke qazaqstandyq kompanııalardyń bastamasy. Ózderi jınap, aparyp, kómektesip jatyr”,- dep aıtty mıúıstr.
Eske salaıyq, qańtar aıynyń basynda Ýkraınanyń Kıev oblysy Býchada "Nezlamnosti" ıaǵnı, "myzǵymastyq" pýnkti ashylǵan edi. Qazaq úı ishine ornalasqan pýnkt turǵyndarǵa qys kezinde jaryq pen jylý bolmaǵan shaqta turǵyndar kelip, jylynyp, telefondaryn qýattap alý úshin ashylǵan.
Ýkraına depýtaty Sergeı Nagornıak joba qazaqstandyq kásipkerler men Ýkraınadaǵy qazaq dıasporasy ókilderiniń arqasynda paıda bolǵanyn aıtqan.
Al Reseı Býchadaǵy kıiz úıge qatysty Qazaqstan bıligin resmı túsinikteme berýge úndedi. Reseı syrtqy ister mınıstrliginiń resmı ókili Marııa Zaharova Qazaqstannyń resmı ókilderi Býchadaǵy kıiz úıge qatysy joǵyn aıtty dep málimdedi.
Degenmen, Zaharova eki eldiń odaqtastyǵyna nuqsan kelmes úshin jáne bul taqyryp ári qaraı da burmalalanbas úshin Qazaqstannyń resmı túsinikteme bergeni jón sanaıdy.
