ينستاگرامداعى direct-گە اكتريسا رەتىندە قۇرمەتتەيتىن، تال بويىندا ءبىر ءمىن جوق گۇلشارات حانىم پەدوفيلدەر تۋرالى قوزعاۋىمدى ءوتىنىپتى. ەرتەرەكتە قىز بالانى ويى بۇزىقتاردان قورعايتىن ەدىك. سوڭعى كەزدەرى ۇل بالامىزدى دا كوزىمىزدەن تاسا ەتپەۋگە تىرىسىپ ءجۇرمىز. بالا تاربيەلەپ وتىرعان ءاربىر اتا-انا مەنىڭ بۇل پوستىمدى جادىندا ساقتاۋىن وتىنەمىن. بۇرىننان وقىپ كەلە جاتقان كوزىقاراقتى وقىرماندارىم الەۋمەتتىك جەلىدە ۇنەمى قوعامدا بولىپ جاتقان پەدوفيلدەر تۋرالى ءبىراز پوست جازىپ، جۋرناليستىك زەرتتەۋىمدى بولىسكەنىمنەن حاباردار.
ال ەندى مىنا اڭگىمەنى وسىدان ءۇش جىل بۇرىن جازدىم. جۋرناليستىك زەرتتەۋىمدى بىرەۋ وقىسا، ەندى ءبىرى وقىماعانى انىق. سوندىقتان دا، مىنا تومەندە جازعاندارىمدى ەسكە مىقتاپ ۇستاپ، ءوز پاراقشالارىڭىزعا ساقتاپ قويىڭىزدار.
ەستەرىڭىزدە مە، ماۋسىم ايىندا (2015 جىلى) الماتى قالاسى، بوستاندىق اۋدانىنداعى كوپ قاباتتى ۇيلەردىڭ بىرىندە 12 جاسار قىزدى ءبىر پەدوفيل زورلاماقشى بولادى. ونى بۇكىل تەلەارنا كورسەتتى. پودەزدەگى بەينەكامەرادان كورىپ وتىرىپ، مەنىڭ ءوزىمنىڭ دەنەم تۇرشىگىپ كەتتى. سول كۇنى جۇمىس بابىمەن بوستاندىق اۋدانى ءىىب-نە بارسام، سوندا وسى ءىستى جۇرگىزىپ جاتىر ەكەن.
- ايتپاقشى، ءسىز قايدا تۇراسىز؟ - دەدى تەرگەۋشى.
مەنىڭ تۇراتىن جەرىمدى بىلگەن پوليتسيا قىزمەتكەرى:
- كەشەگى وقيعا ءسىز تۇرىپ جاتقان ءۇيدىڭ جانىنداعى 5 قاباتتى ۇيدە بولعان.
كوزىم شارامنان شىعىپ كەتە جازداعان مەن:
- ول جاۋىزدى ۇستادىڭىزدار ما؟ - دەپ سۇرادىم.
- وندايلار ۇستاتا ما، بىراق، قولىمىزدا فاكت بار. قازىر سۋرەتىن بارلىق جەرگە قويىپ قويدىق.
- ۆيدەودا 15 سەكۋند كورسەتىلگەن. ايتەۋىر، قىز امان با؟
- ءوزىنىڭ دەگەنىن ىستەي الماعان. شۇكىر، قىزعا تيىسپەگەن.
ابىروي بولعاندا ول ەكى اياقتى ءيتتىڭ ارام پيعىلى ىسكە اسپاي قالعانىنا قاتتى قۋاندىم. بىراق بايعۇس قىزدىڭ جۇدىرىقتاي جۇرەگىنەن دىم قالماعان شىعار. بۇل جاۋىزدار تاپا-تال تۇسكە دە قارامايدى ەكەن. راس ايتامىن سول كۇنى ۇيگە كەلگەننەن كەيىن، ءۇي جاعىم كۇزەتشىلەرگە تولىپ، ءجۇز كامەرا بولسا دا، جۇرەگىم القىمىمنان شىقتى. جان-جاعىما الاق-جۇلاق ەتىپ، مىڭ مارتە قاراعان شىعارمىن. ءدال جانىمداعى 5 قاباتتى ۇيلەردى تەرەزەمنەن قارايمىن دا، تالاي رەت سول جەرلەرگە كولىگىمدى ءتۇن جارىمىندا قويعان كەزدەرىم ەسىمە ءتۇسىپ، قالشىلداپ كەتەم. ال وزدەرىڭىز ويلاڭىزدار، كىپ-كىشكەنتاي قىزدىڭ كۇيىن. ۇيگە كىرە سالىسىمەن سول كۇنى وسى پەدوفيلدەر تۋرالى زەرتتەي باستادىم. اقپاراتتاردى وقىپ وتىرىپ تاڭدانباسقا بولمادى.
پەدوفيلدەردى زەرتتەپ جۇرگەن پسيحولوگ پەن پسيحياترلاردىڭ ءوزى تۇسىنبەي جۇرگەنگە ۇقسايدى. اۋرۋ دەيىن دەسە، ساۋ ادامنىڭ تاماعىن جەپ، تىرلىگىن جاسايدى ەكەن. ماسەلەن، رەسەيدە وسىدان بىرنەشە جىل بۇرىن ءبىر كىشكەنتاي قىزدى زورلاپ، ولتىرگەن مانياك-پەدوفيلدى ۇستاۋ ءۇشىن، تىزىمگە ىلىنگەن پەدوفيلدارعا تەكسەرۋ جۇرگىزگەن. سونىڭ ىشىندە بىرەۋى وتە ءبىلىمدى كىسى ەكەن. الايدا ايەلى ءوزىنىڭ كۇيەۋىن قاتتى جاقسى كورگەندىكتەن، كۇيەۋىنىڭ قىلمىسىن بىلسە دە، جاسىرىپتى.
بىراق 3 كۇننەن سوڭ، ايەلى كۇيەۋىن ۇستاپ بەرگەن كورىنەدى.
- مەن جولداسىمدى قاتتى ءسۇيدىم. بىراق ءدال مىناداي قادامعا بارعانىنا سەنە المادىم باستاپقىدا. 11-12 جاستاعى پاك قىزداردى زورلاپ، ولتىرگەنى مەنىڭ جانىما قاتتى باتتى. سول ءۇشىن الدارىڭىزعا كەلىپ وتىرمىن، - دەيدى جارى.
تاعى ءبىر مىسال، سول رەسەيدە مۇعالىم پەدوفيل ۇستالعان كورىنەدى. ءتىلى وتە مايدا. بىردەن بالالاردى وزىنە باۋلاپ الادى. ۇلگىلى ۇستازدى بۇكىل مەكتەپ قاتتى قۇرمەتتەگەن. ۇستالماس پا ەدى كىم ءبىلسىن، ەگەر 11 جاستاعى پىسىق قىز سول كۇنى قاشىپ كەتپەگەندە. بارلىعى تاڭدانىپ "ونىڭ تۇرىنە قاراساڭىز، ادامعا قيانات جاساماق تۇگىلى، شىبىن دا ولتىرمەيتىن كىسى سياقتى، سۇمدىق" دەپ جاعالارىن ۇستاۋدا ارىپتەستەرى.
امەريكاندىقتار پەدوفيلدارمەن قانشاما جىلدار كۇرەسىپ كەلەدى. ءتۇرلى ترەنينگتەر دە جۇرگىزىپ جاتىر. ماسەلەن، بالاباقشاداعى ۇل-قىزداردى پسيحولوگيالىق تۇرعىدا زەرتتەگەن. سونداعى بايقاعانى 95 پايىز بالا اڭعال بولىپ كەلەدى. ولارعا "انا جاقتا سەنىڭ ماماڭ كۇتىپ تۇر، ءجۇر اپارايىن" دەسە، ەرىپ كەتە بارعان. سونىڭ ىشىندە ءبىر عانا بالاقاي "جوق، مەنىڭ مامام قايتسە دە، وسى جەرگە كەلەدى. مەن ءسىزدى تانىمايمىن" دەپ ايقايلاعان. كوردىڭىز بە، كەيدە بالالاردىڭ ۇيدە اتا-انامەن اشىلىپ سويلەسكەننىڭ ارقاسى بۇل.
اتا-انالارعا ايتارىم كۇندەلىكتى بالالارىڭىزعا ايتىپ وتىرىڭىزدار:
1. ەشقاشان جالعىز جۇرمەسىن. جانىندا توپتاسقان دوستارى بولسىن.
2. بوتەن ادامنىڭ شاقىرعانىنا بارماسىن. اقشا ۇسىنعان جاعدايدا بولسا، الماسىن.
3. كۇندەلىكتى بالالارىڭىزدىڭ نەمەن اينالىسقانىن قاداعالاڭىز. ۆكونتاكتە مەن ءتۇرلى جەلىدە وتىرعان بالالارىڭىزدى قاداعالاڭىزدار. ول جەردە نەشە ءتۇرلى اعىمدار بار. الدە، كومپيۋتەر، پلانشەت، سمارتفونىنا ءتۇرلى جولداعى پورنوگرافيالىق جەلىنى الىپ تاستايتىن فۋنكتسيانى قوسىپ بەرىڭىز. "روديتەلسكي كونترول" دەگەن بولادى.
4. بالاڭىزدىڭ قولىنا ىسقىرىق، الدە قازىر شىعىپ جاتقان كومپاس GPS ساعاتتى بايلاپ قويىڭىز. اگاراكي، بوتەن ەركەك جانىنا جاقىنداعاندا، ول دەرەۋ ساعاتىن باسىپ، الدە ىسقىرىقپەن شاقىرا قويادى. نەگىزى GPS ساعاتىن تاعىپ جۇرسە، ءوزىڭىز دە ءبىلىپ وتىراسىز بالاڭىزدىڭ قاي جەردە جۇرگەنىن.
دۇنيەجۇزىندە وسى پەدوفيلداردان كۇنىنە جۇزدەگەن بالا زارداپ شەگۋدە. بۇل ايىقپاس اۋرۋ ەكەن. مۇنىمەن اۋىرعاندار وزدەرىن توقتاتا المايدى. جازاسىن العاننان سوڭ ءبارىبىر سول ىستەگەنىن جاسايدى. ەرتەرەكتە گرەكتەر مۇنداي پەدوفيل جاۋىزداردىڭ سول جەرىن ەگەۋقۇيرىقتارعا جەگىزگەن (ونىڭ سۋرەتى دە بار، بىراق بۇل جەرگە قويمادىم). سونى باسقا ەر ادامدارعا كورسەتكەن. سەبەبى، ەركەكتەرگە ساباق بولسىن دەيدى. بۇل پەدوفيلدار كەڭەس ۇكىمەتى تۇسىندا دا بولعان، بىراق ونداي نارسەلەردى كوبىنەسە حالىققا جەتكىزبەگەن. قۇپيا تۇردە وزدەرى جازالاعان.
ال اتا-انا، سىزدەرگە ايتارىم، كوزدەرىڭىزدىڭ اق پەن قاراسى بولعان قۇلىندارىڭىزبەن كۇندەلىكتى سىرلاسىپ جəنە ولار مىنا قاعيدالاردى ۇستانىپ جۇرسە، پەدوفيل تۇگىلى سايتان دا جانىنا جاقىنداي المايدى. امان ءجۇرسىن جەر بەتىندەگى ءاربىر بالاقاي، ءاۋمين!
بيبىگۇل داۋلەتبەكقىزى
