الماتىدا انتيكوردىڭ جالعان قىزمەتكەرى ۇستالدى. بۇل تۋرالى سىبايلاس جەمقورلىققا قارسى قىزمەت راستادى، دەپ حابارلايدى «ادىرنا» ۇلتتىق پورتالى.
2023 جىلدىڭ 6 قاڭتارىندا سىبايلاس جەمقورلىققا قارسى قىزمەتتىڭ وزىندىك قاۋىپسىزدىك دەپارتامەنتى الماتى پوليتسيا دەپارتامەنتىنىڭ قىزمەتكەرلەرىمەن بىرلەسىپ، جولدا ءجۇرۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتىلماۋ ماقساتىندا ءوزىن سىبايلاس جەمقورلىققا قارسى قىزمەتتىڭ قازىرگى قىزمەتكەرى رەتىندە تانىستىرعان 1987 جىلى تۋعان ازامات ۇلان رايدى اشكەرەلەدى.
قۇجاتتاردى تەكسەرۋ بارىسىندا قۇقىق بۇزۋشى قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دەپارتامەنتى قىزمەتكەرىنىڭ جالعان قىزمەتتىك كۋالىگىن كورسەتكەن.
"ازامات ۇستالىپ، ۋاقىتشا ۇستاۋ يزولياتورىنا قاماۋعا الىندى. تەرگەۋ جالعاسىپ جاتىر. تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.
سىبايلاس جەمقورلىققا قارسى ءىس-قيمىل اگەنتتىگى قىزمەتتىك كۋالىكتەردى قولدان جاساۋ قر قىلمىستىق كودەكسىنىڭ 385-بابى بويىنشا قىلمىستىق جاۋاپتىلىققا اكەپ سوقتىراتىنىنا نازار اۋدارادى. وسى ازاماتتىڭ قاتىسۋىمەن قۇقىققا قارسى ءىس-قيمىل دەرەگى بويىنشا قانداي دا ءبىر اقپارات بولعان جاعدايدا، سىبايلاس جەمقورلىققا قارسى قىزمەتتىڭ Call-ورتالىعىنا 1424 نەمەسە 8 (7172) 90-94-08 ءنومىرى بويىنشا حابارلاسۋىڭىزدى سۇرايمىز", - دەلىنگەن حابارلامادا.
