الماتىنىڭ تاۋلى ايماقتارى ءتۋريزمدى دامىتۋدىڭ ستراتەگيالىق باعىتتارىنىڭ ءبىرى رەتىندە قاراستىرىلىپ وتىر. تابيعي الەۋەتتى ءتيىمدى پايدالانۋ، تۋريستىك ينفراقۇرىلىمدى جەتىلدىرۋ جانە زاماناۋي دەمالىس ورىندارىن قالىپتاستىرۋ ارقىلى ءوڭىردىڭ تۋريستىك تارتىمدىلىعىن ارتتىرۋ كوزدەلۋدە.
تاۋ ءتۋريزمىن دامىتۋ اياسىندا كولىك جانە ينجەنەرلىك ينفراقۇرىلىمدى جەتىلدىرۋ، تۋريستەرگە ارنالعان سەرۆيستىك نىسانداردى دامىتۋ، قاۋىپسىزدىك جۇيەسىن كۇشەيتۋ جانە جاڭا تۋريستىك مارشرۋتتاردى قالىپتاستىرۋعا باسىمدىق بەرىلۋدە.
جوبالاردىڭ ماڭىزدى باعىتتارىنىڭ ءبىرى – Almaty Superski. كلاستەردى دامىتۋ ارقىلى الماتىنىڭ تاۋ بوكتەرىندەگى اۋماقتاردى ءبىرتۇتاس تۋريستىك كەڭىستىككە اينالدىرۋ، حالىقارالىق ستاندارتتارعا سايكەس كەلەتىن ينفراقۇرىلىم قالىپتاستىرۋ جانە تۋريستەرگە قىزمەت كورسەتۋ ساپاسىن ارتتىرۋ جوسپارلانۋدا.
تاۋ ءتۋريزمى تەك قىسقى دەمالىسپەن شەكتەلمەيدى. جىلى مەزگىلدە ترەكينگ، جاياۋ تۋريزم، تاۋ ۆەلوسيپەدى، الپينيزم جانە ەكولوگيالىق تۋريزم سياقتى باعىتتاردى دامىتۋعا مۇمكىندىك بار. وسىلايشا، تاۋلى ايماقتاردى جىل بويى تۋريستىك باعىت رەتىندە قالىپتاستىرۋعا جاعداي جاسالادى.
تۋريزم سالاسىنىڭ دامۋى جەرگىلىكتى كاسىپكەرلىككە دە جاڭا مۇمكىندىكتەر بەرەدى. قوناقۇيلەر، تاماقتانۋ ورىندارى، گيد قىزمەتتەرى، كولىك جانە تۋريستىك جابدىقتاردى جالعا بەرۋ سياقتى قىزمەت تۇرلەرىنىڭ دامۋى جاڭا جۇمىس ورىندارىنىڭ اشىلۋىنا ىقپال ەتەدى.
سونىمەن قاتار، تاۋ ءتۋريزمىن دامىتۋ كەزىندە تابيعي ەكوجۇيەنى ساقتاۋ ماسەلەسىنە ەرەكشە ءمان بەرىلەدى. تۋريستىك ينفراقۇرىلىمدى دامىتۋ قورشاعان ورتاعا ۇقىپتى قاراۋ، ەكولوگيالىق تالاپتاردى ساقتاۋ جانە تابيعي اۋماقتاردىڭ تۇراقتى دامۋى قاعيداتتارىمەن قاتار جۇرەدى.
الماتىنىڭ تاۋلى ايماقتارىن دامىتۋ ناتيجەسىندە قالا تۇرعىندارى مەن قوناقتارى ءۇشىن قولجەتىمدى، قاۋىپسىز جانە زاماناۋي دەمالىس مۇمكىندىكتەرىن كەڭەيتۋ، سونداي-اق الماتىنى ورتالىق ازياداعى تارتىمدى تاۋ ءتۋريزمى ورتالىقتارىنىڭ ءبىرى رەتىندە تانىتۋعا جاعداي جاساۋ كوزدەلىپ وتىر.
