مادەنيەتتى ەۋروپاعا اپارعان كوشپەندىلەردىڭ ۇرپاعى قازىر، نەگە مادەنيەتتى باتىستان ۇيرەنىپ ءجۇر؟ جاناربەك ءاشىمجان اعام كەزىندە جازىپ ەدى، «ەۋروپا بۇتىنا جاپىراق بايلاپ جۇرگەندە ءبىزدىڭ بابالارىمىز ءوزىن قويىپ، اتىنا دەيىن سارى التىنمەن كيىندىرگەن» دەپ. بىزگە قازىر كيىنۋ مادەنيەتىن قويىپ، سويلەۋ، سويلەسۋ مادەنيەتىن قايتادان باسىنان باستاپ ۇيرەنۋ قاجەت بولىپ ءجۇر.
مىسالى، الەۋمەتتىك جەلىدەگى ءبىر پوستتىڭ استىنا جوق دەگەندە 2-3 ادام مادەنيەتسىز پىكىر قالدىرادى. بۇل ۇلكەندەردىڭ عانا پاراقشاسىنان اڭعارعانىمىز. ال، جاستار كوپ وتىراتىن ۆك جەلىسىنە كىرسەڭىز توبە شاشىڭىز تىك تۇرادى.
رەسەي پرەمەر ليگاسىنا اۋىسقان ەركەبۇلان سەيداحمەتتىڭ «ۋفا» كلۋبى مەن باقتيار زاينۋتدينوۆتىڭ «روستوۆىنىڭ» سايتىنداعى قاراكوزدەرىمىزدىڭ ءبىر-ءبىرىن بوقتاپ جاتقانىن كورگەن رەسەيلىكتەردىڭ ءوزى ۇيالىپ كەتكەن بولاتىن.
كەشە عانا دميتري شومكو اعىلشىندىق «استون ۆيللاعا» اۋىسادى دەگەن اقپارات شىققانىن ەستىگەن بەتتە، وسى كوماندانىڭ رەسمي سايتىنا كىرگەنبىز. تاعى دا، ءبىرىن-ءبىرى اكە-شەشەسىنەن تۇك قالدىرماي «تۇگەندەپ» جاتقان ءوز قانداستارىمىز. بىزگە قازاقستاننىڭ ءىشى ازدىق ەتىپ، الەمدىك دارەجەگە شىعا باستاعانداي اسەر قالدىرادى.
بۇل تەك قانا سپورتقا قاتىستى جاڭالىقتارىنان كورگەنىمىز. ودان قالسا ەلگە، جەرگە، رۋعا ءبولىنىپ الىپ قىرىلىپ جاتقان تاعى دا قازاق بالالارى. ءبىر-بىرىنە ءنومىرىڭدى قالدىرشى دەپ. باسقا ەلدەردىڭ سايتىنا كىرسەڭىز بوقتىق بالاعات ەمەس، سول جاڭالىققا قاتىستى ءوز وي-پىكىرلەرىن عانا كورەمىز.
سەنىڭ جازعان پىكىرىڭ تەك ءوز ويىڭ عانا ەمەس، ۇلتتىڭ دا ساناسىنان حابار بەرەتىنىن ەسكەرسەك، الەۋمەتتىك جەلىدە اۋىزعا اباي بولايىقشى.
«ادىرنا» ۇلتتىق پورتالى
