قازاقستان ءماجىلىسى ءبۇر كۇندىك جۇمىسىن «قاڭتار وقيعاسىنا» ارنادى. وتىرىس بارىسىندا امانجول التاەۆ «ديكي ارمان» لاقاپ اتىمەن ەلگە تانىلعان ارمان جۇماگەليەۆتەن ەشقانداي دا "الىپ تۇلعالى، اتاعى جەر جارعان الپامىس باتىر" جاساۋدىڭ كەرەگى جوعىن ايتتى، دەپ جازدى "ادىرنا" ۇلتتىق پورتالى.
امانجول التاەۆ:
- «قاڭتار تراگەدياسى» تۋرالى الىپ-قاشپا پىكىرلەر قالىپتاسىپ، وقيعانىڭ شىندىققا جاناسپايتىن ءتۇرلى نۇسقالارى تارالۋدا. ناتيجەسىندە سول ورتانىڭ قولدان جاسالعان جالعان قاھارماندارى پايدا بولدى.
تەنتەكتەن – تۇلعا، ارانداتۋشىدان – باتىر، سوتقاردان – ساردار، قىلمىسكەردەن – قاھارمان جاساعىسى كەلەتىن ادىلەتسىز ارەكەتتەر ەتەك الىپ بارادى. بۇعان «قاڭتار وقيعاسىنا» دەيىن دە زاڭعا قايشى ارەكەتتەرىمەن تانىلعان «ديكي ارماندى» مىسالعا كەلتىرەيىن.
الەۋمەتتىك جەلىلەردە ونىڭ جاعىمدى بەينەسىن جاساۋعا تىرىسىپ، جازىقسىز قاماۋعا الىندى دەگەن سەكىلدى نەگىزسىز، ءپاتۋاسىز پىكىرلەر قالىپتاستىرىپ، «ديكي ارماننان» الپامىس جاساۋعا تىرىسۋدا. مۇنداي قوي تەرىسىن جامىلعان قاسقىردىڭ كەيپىندەگى جاساندى باتىرسىماقتىڭ بەينەجازبالارى ۆيرۋس سەكىلدى بىردەن تارالىپ كەتۋدە. ال وسىنداي جالعان جارناماعا قۇرىلعان اقپاراتتىق شابۋىلدار جاس ۇرپاقتىڭ ساناسىنا سوققى بولارى ءسوزسىز. سونىڭ سالدارىنان جاستاردان «وسى زاماننىڭ باتىرلارى كىم؟» دەپ سۇراساڭ، ءورت ىشىندەگى ورىمدەي بالا مەن كەيۋانا اجەنى قۇتقارىپ قالعان، ەرەن ەرلىك كورسەتكەن اسقار سەكىلدى جاڭا زاماننىڭ باتىرلارىن ەمەس، توپ قۇرىپ، ءتىسىن جاسىرعان «ديكي ارماندى» اتاسا تاڭعالماڭىز. مىنە، ءبىز بۇگىنگى جاس ۇرپاقتى ءتالىمى تەرىس، سىرتى ءبۇتىن، ءىشى ءتۇتىن «ديكي ارماندارعا» ەرىپ كەتۋدەن قورعاۋىمىز كەرەك، - دەدى دەپۋتات.
ورايى كەلگەندە ايتا كەتەيىك، الماتى قالالىق سوتىنىڭ شەشىمىمەن ارمان جۇماگەلديەۆتى قاماۋدا ۇستاۋ مەرزىمى 2023 جىلدىڭ 7 ناۋرىزىنا دەيىن ۇزارتىلدى.
"ادىرنا" ۇلتتىق پورتالى
