"قىزىمنىڭ قانىن ساتپاڭدار!" - باسقارما "قاندى قاڭتاردا" اتىلعان ءتورت جاسار ايكوركەمنىڭ ءىسىن توقتاتىپ تاستادى

3501
Adyrna.kz Telegram

"قاڭتار وقيعاسى" كەزىندە وققا ۇقشان "ماڭگىلىك بالا بەينە", ءتورت جاسار ايكوركەمنىڭ قازاسىنا قاتىستى تەرگەۋ ءىسىن وڭتۇستىك وڭىرلىك اسكەري-تەرگەۋ باسقارماسى توقتاتىپ تاستادى. ايىپتىلار قازاقتىڭ ءبىر پەرزەنتىن "قان بوكتىرcە" دە، تەرگەۋگە جاۋاپتى تاراپ بولعان ءىستىڭ «قىلمىستىق قۇرامى جوق» دەپ تانىعان. بۇل جايلى ايكوركەمنىڭ اكەسى ايدوس مەلدەحان حابارلادى، دەپ جازادى "ادىرنا" ۇلتتىق پورتالى "اzattyq"-قا سىلتەمە كورسەتە وتىرىپ.

تەرگەۋشى تاراپ قازاقتىڭ اياۋلى پەرزەنتىن ولىمگە قيعانداردى زاڭ نەگىزىندە ارەكەتكە باردى دەپ ساناپ وتىر. بۇعان دەيىن ءتورت جاسار ءبۇلدىرشىننىڭ كەيىن باس سۇيەگىن جوعالتىپ جىبەرگەنى دە حابارلانعان ەدى.

- تەرگەۋ ورگانى ىستە «قىلمىس قۇرامى جوق» دەيدى. ياعني، ايكوركەمدى اتۋ قىلمىس ەمەس، قارۋدى زاڭدى نەگىزدە قولدانعان-مىس. ارينە ءبىز شاعىمداناتىن بولامىز، - دەدى ادۆوكات رافيك بەيسەبەكوۆ بۇعان قاتىستى.

ءتورت جاسىندا وزىنە قارسى كەزەنگەن قارۋ مەن اتىلعان وقتىڭ كەسىرىنەن ماڭگىلىك ۇيقىعا كەتكەن ايكوركەمنىڭ اكەسى قىلمىسكەردى تاپپايىنشا جانى جاي تابار ەمەس.

- بۇل ماسقارا عوي، ءسوزىم جوق. قىزىمدى ولتىرگەندەردى تابۋدىڭ ورنىنا ءىستى توقتاتقان، ونىسىمەن قويماي ءىستى «قۇپيا» ەتىپتى. جەلتوقساننىڭ اياعىندا توقتاتىپتى. كەشە ونى ەستىپ ادۆوكاتىم ايقاي-شۋ شىعارعاننان كەيىن حات جىبەرىپتى. ەندى ءىس ماتەريالدارىن دا كورە المايتىن بولدىق. نە ىستەرىمدى دە بىلمەي وتىرمىن، ەستي سالا قولحات جازىپ اۋرۋحانادان بۇگىن شىقتىم، - دەدى 6 قاڭتاردا ايدوس مەلدەحان ازاتتىققا بەرگەن سۇحباتىندا.

ەسكەرىڭىزگە سالا كەتەيىك، ءتورت جاسار ايكوركەم مەلدەحان بىلتىر 7 قاڭتاردا الماتى قالاسىندا دۇكەن ىزدەپ شىققان جاقىندارىمەن بىرگە كولىكتە وتىرعان كەزدە وققا ۇشتى. سول وقيعا كەزىندە 16 جاسقا اياق باسقان ايكوركەمنىڭ اپكەسى جانەلگە جەتى وق تيگەن. ونىڭ ەكەۋى كەۋدەسىن تەسىپ وتكەن، دەنەسىنەن بەس وق الىندى. جەدەل مەديتسينالىق جاردەم اۋرۋحاناسىندا دەنەسىنەن 4 وقتى ومىرتقا، وكپەسى، جامباسىنان العان. بەسىنشى وقتى الماتى قالاسى باعاناشىل ىقشاماۋدانىنداعى بالالار حيرۋرگياسىندا الدى. كولىكتى كوزدەپ، وعان كىمنىڭ وق اتقانى ءالى كۇنگە جۇمباق كۇيىندە قالدى. اكەسى كولىكتەن اسكەري وق تاپقانىن حابارلادى. تەرگەۋشى تاراپ، بۇدان قانداي دا ءبىر قىلمىستىق ارەكەتتەردى بايقاماي، بولعان ءىستى جوقققا شىعارىپ باعۋدا.

"ادىرنا" ۇلتتىق پورتالى 

پىكىرلەر