ەلىمىزدە قارىزىن وتەي الماي جۇرگەندەر 3 ناۋرىزدان باستاپ بانكروتتىققا ءوتىنىش بەرە الادى، دەپ حابارلايدى «ادىرنا» ءتىلشىسى.
2022 جىلعى 29 جەلتوقساندا قر پارلامەنت سەناتى «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭدى ماقۇلدادى.
ول سوتتان تىس بانكروتتىعى، سوت بانكروتتىعى جانە تولەم قابىلەتتىلىگىن قالپىنا كەلتىرۋ راسىمدەرىن قاراستىرادى.
بارلىق ءۇش ءراسىمدى تەك بورىشكەر عانا باستايدى، ياعني نەسيە بەرۋشى نەمەسە وزگە كرەديتور بورىشكەرگە قاتىستى بۇل راسىمدەردى قولدانۋعا قۇقىعى جوق.
5,5 ميلليون تەڭگەدەن اساتىن قارىزدار بويىنشا جانە باسقا دا بەرەشەك تۇرلەرى بويىنشا ازاماتتار سوت بانكروتتىعىنا جۇگىنە الادى. ونىڭ ماقساتى — بانكروتتىڭ مۇلىكتىك ماسساسى ەسەبىنەن كرەديتورلاردىڭ تالاپتارىن بارىنشا قاناعاتتاندىرۋ.
بانكروتتىقتان كەيىن پايدا بولاتىن سالدار:
– 5 جىلعا نەسيەلەر مەن كرەديتتەر الۋ شەكتەۋى;
– 7 جىلدان كەيىن عانا بانكروتتىققا قايتا جۇگىنۋ قۇقىعى;
– 3 جىل قارجىلىق جاعدايىنا مونيتورينگ جۇرگىزىلەتىن بولادى.
ايتا كەتەيىك، اليمەنت ءوندىرۋ، باسقا ادامنىڭ ءومىرى مەن دەنساۋلىعىنا كەلتىرىلگەن زياندى وتەۋ، سونداي-اق قىلمىستىق قۇقىق بۇزۋشىلىقتار ءۇشىن كەلتىرىلگەن زياندى وتەۋ بويىنشا بەرەشەكتەر ەسەپتەن شىعارىلمايدى.
