قازىردىڭ وزىندە 40 مىڭ ازاماتىمىز لۋدومانيادان زارداپ شەككەنى رەسمي انىقتالدى. قۇمار ويىن مىڭداعان وتباسىنىڭ شىرقىن بۇزىپ، اجىراستىرىپ، كوپتەگەن بالانى ءتىرى جەتىمگە اينالدىردى.
باس پروكۋراتۋرانىڭ دەرەگىنە سايكەس، بيىل قازاقستاندا قۇمار ويىندار مەن قارىزعا باتۋدىڭ كەسىرىنەن شامامەن 200-گە جۋىق ادام ءوز-وزىنە قول جۇمساعان. بۇل تەك قازاقستاننىڭ عانا ەمەس بۇكىل الەم ەلدەرىنىڭ باس اۋىرۋىنا اينالعان پروبلەما.
دەگەنمەن، باس پروكۋراتۋرانىڭ مالىمەتى بويىنشا ويىنعا قۇمار ازاماتتارىمىزدىڭ سانى بويىنشا مەملەكەتتىڭ ءالى دە تولىق تۇسىنىگى جوق.
ء«وز-وزىنە قول جۇمساۋ ماسەلەسىنە كەلەتىن بولساق، جالپى الەمدە لۋدومانيا كەسىرىنەن ءسۋيتسيدتىڭ 15 ەسە ءوسۋى بايقالادى. ەڭ قورقىنىشتىسى، جاستار جاپپاي ءباس تىگۋگە قۇمار بولىپ بارا جاتىر. قارىزعا باتىپ، ءوز-وزىنە قول جۇمساعان وقۋ ورنىنىڭ ستۋدەنتتەرى بار، اتا-اناسىنىڭ ءومىرىن قيعاندار بار، دوسىن ولتىرگەندەر تاعى بار»، – دەيدى قر بپ باسقارماسىنىڭ باستىعى ماقسات وراقباەۆ.
بۇدان بولەك اقتوبەدە ەكى سپورت مەكتەپ ديرەكتورىنىڭ الاڭداردى زاڭسىز جالعا بەرۋدەن تاپقان 12 ملن تەڭگەنى باسكە تىگىپ جىبەرگەنى انىقتالدى.
ەڭ ماڭىزدىسى بۇل جۇيەلى تۇردە قايتالانىپ جاتقان وقيعالار. سوندىقتان دا قۇمار ويىندار ماسەلەسىنە بۇدان بىلاي كوز جۇما قاراۋعا بولمايدى. جوعارىدا اتالعان ولقىلىقتىڭ ورنىن تولتىرىپ، بۋكمەكەرلەردىڭ جاۋاپكەرشىلىگىن ارتتىرۋ ءۇشىن «بىرىڭعاي ەسەپكە الۋ جۇيەسى» ىسكە قوسىلادى.
ايقىن جۇيە، بىرىڭعاي ەرەجە مەن تۇراقتى مونيتورينگ بيزنەس نەمەسە قاراپايىم ادامداردى شەكتەۋ نيەتىمەن ەمەس، بۇل سالادا ءتارتىپ ورناتۋ قاجەتتىلىگىمەن بايلانىستى.
