پرەزيدەنت «پەداگوگ مارتەبەسى تۋرالى» زاڭعا ۇستاز قۇقىعىن قورعاۋ جونىندە وزگەرىستەر ەنگىزۋدى ۇسىندى. بۇل تۋرالى اقوردا جازدى، دەپ حابارلايدى "ادىرنا".
«مۇعالىمنىڭ قۇقىعىن قورعاۋ ماسەلەسى ءاردايىم باستى نازاردا بولۋعا ءتيىس. مەن ءسوز باسىندا ۇستازداردىڭ ءوز مىندەتىنەن تىس جۇمىستاردان بوساتىلعانىن ايتتىم. بىراق كەيدە جەرگىلىكتى بيلىك وكىلدەرى زاڭ تالاپتارىن ورەسكەل بۇزىپ جاتادى. پروكۋراتۋرا ورگاندارى مۇنداي زاڭ بۇزۋشىلىقتارعا توسقاۋىل قويۋى كەرەك.
سونداي-اق بالالارعا قاتىستى كەز كەلگەن جازاتايىم جاعداي ءۇشىن دە مۇعالىمدى جازالاۋ ورىنسىز دەپ سانايمىن»، – دەدى پرەزيدەنت.
مەكتەپتەن تىس جەردە، اتا-انالاردىڭ جاۋاپسىزدىعىنان وقىس وقيعا بولسا، وعان ۇستاز جاۋاپتى ەمەس.
«الماتى وبلىسىندا تۇلەكتەر اراسىندا بولعان قايعىلى جاعداي ءۇشىن ديرەكتور مەن مۇعالىمدەر جاۋاپقا تارتىلىپ، جۇمىستان شىعارىلدى. مينيسترلىك ولاردىڭ مۇددەسىن قورعاپ قالدى. دۇرىس. ءبىز مۇنداي كەلەڭسىزدىككە جول بەرمەۋىمىز كەرەك»، – دەدى توقاەۆ.
«پەداگوگ مارتەبەسى تۋرالى» زاڭعا ۇستاز قۇقىعىن قورعاۋ جونىندە وزگەرىستەر ەنگىزۋ قاجەت ەكەنىن ايتتى. مەملەكەتتىڭ مىندەتى – مۇعالىمنىڭ قوعامداعى بەدەلىن جانە مارتەبەسىن مەيلىنشە ارتتىرۋ.
«ماڭعىستاۋدا بالالار ساپاسىز تاماقتان ۋلانىپ قالعانىن بىلەسىزدەر. وسى سۇمدىق جاعدايدان كەيىن مەكتەپتەگى تاماقتىڭ ساپاسىن قاداعالاۋ جۇمىسىن دەنساۋلىق ساقتاۋ مينيسترلىگى تولىعىمەن ءوز مىندەتىنە الدى. بۇل وتە دۇرىس شەشىم بولدى. جالپى ءبىلىم سالاسى – مەملەكەت ءۇشىن ستراتەگيالىق ءمانى بار سالا. سوندىقتان قۇزىرلى مەملەكەتتىك ورگاندار ءبىلىم سالاسىنداعى ماسەلەلەردەن سىرت قالماۋى كەرەك»، – دەيدى پرەزيدەنت.
