قازاق عىلىمى مەن ءبىلىمىنىڭ قاراشاڭىراعى ۇلتتىق عىلىم اكادەمياسى مەملەكەت قاراماعىنا قايتارىلدى. ۇكىمەتى ءتيىستى قاۋلىنى قابىلداپ، پرەزيدەنت ماقۇلدادى، دەپ حابارلايدى پرەمەر-ءمينيستردىڭ رەسمي سايتى. بۇل جايلى "ادىرنا" ۇلتتىق پورتالى حابارلادى.
قازاق ەلىنىڭ پرەزيدەنتى ەلىمىزدەگى عىلىم سالاسىنىڭ جاعدايىنا قاتىستى:
- قازىر قوعامدا قۇر اتاق ءۇشىن عىلىمي دارەجە العىسى كەلەتىندەردىڭ بار ەكەنى جاسىرىن ەمەس. بۇل جاعىمسىز ۇردىسكە اينالىپ بارادى. ولار، شىن مانىندە، عىلىمي اتاققا يە بولعانىمەن، عىلىم جولىن جالعاستىرمايدى. سونىڭ كەسىرىنەن مەملەكەتتىڭ قانشاما قاراجاتى بوسقا كەتەدى. بۇعان ءبىرجولا توسقاۋىل قوياتىن كەز كەلدى. ءبىز عىلىمعا شىنايى بەرىلگەن ازاماتتاردى عانا قولداۋىمىز قاجەت، - دەپ پىكىر بىلدىرگەن ەدى.
ەندىگىدە قازاقستاننىڭ ۇلتتىق عىلىم اكادەمياسى جارعىلىق كاپيتالىنا مەملەكەت ءجۇز پايىز قاتىساتىن كوممەرتسيالىق ەمەس اكتسيونەرلىك قوعامعا اينالادى. قر ۇكىمەتى ءتيىستى قاۋلىنى قابىلدادى.
«قازاقستان رەسپۋبليكاسىنىڭ ۇلتتىق عىلىم اكادەمياسى» كەاق قىزمەتىنە:
- الەۋمەتتىك-ەكونوميكالىق دامۋ باسىمدىقتارىنا سايكەس عىلىمي، عىلىمي-تەحنيكالىق جانە يننوۆاتسيالىق قىزمەتتىڭ باسىم باعىتتارىن، سونداي-اق قازاقستان رەسپۋبليكاسىنداعى ستراتەگيالىق، ىرگەلى جانە قولدانبالى عىلىمي زەرتتەۋلەردىڭ باسىم باعىتتارىن ايقىنداۋ جونىندەگى ۇسىنىمداردى ازىرلەۋ;
- عىلىم جونىندەگى جىل سايىنعى ۇلتتىق باياندامانى دايىنداۋدى جانە باسىپ شىعارۋدى ۇيلەستىرۋ;
- عىلىمدى دامىتۋ بويىنشا فورسايتتىق زەرتتەۋلەردى دايىنداۋدى جانە جۇرگىزۋدى ۇيلەستىرۋ;
- عىلىم سالاسىندا اتاۋلى سىيلىقتار مەن ستيپەنديالار الۋعا كونكۋرستار وتكىزۋ;
- عىلىم مەن تەحنيكانىڭ ءارتۇرلى سالالارىندا عىلىمي زەرتتەۋلەر جۇرگىزۋ;
- عىلىمي جۋرنالدار شىعارۋ، حالىقارالىق عىلىمي جانە عىلىمي-تەحنيكالىق ىنتىماقتاستىقتى دامىتۋعا قاتىسۋ;
- عىلىمدى تانىمال ەتۋگە قاتىسۋ جانە ت.ب. كىرەدى.
قر ۇعا جۇمىسىن قارجىلاندىرۋ رەسپۋبليكالىق بيۋدجەتتەن بولىنگەن بيۋدجەت قاراجاتى ەسەبىنەن جۇرەدى.
"ادىرنا" ۇلتتىق پورتالى
