“14,5 ملرد تەڭگە”: قايرات بورانباەۆتىڭ ءىسى سوتقا جولداندى

2396
Adyrna.kz Telegram

قايرات بورانباەۆتىڭ ءىسى سوتقا جولداندى. بۇل تۋرالى قر قارجى مونيتورينگى اگەنتتىگى قايرات بورانباەۆقا قاتىستى سۇيىتىلعان مۇناي گازىن ساتىپ الۋ جانە قىلمىستىق جولمەن الىنعان اقشالاي قاراجاتتى زاڭداستىرۋ كەزىندە 14,5 ملرد تەڭگە ۇرلاۋ فاكتىلەرى بويىنشا تەرگەۋدى اياقتاعان مالىمدەدى، دەپ حابارلايدى “ادىرنا” ۇلتتىق پورتالى.

«اگەنتتىك «ازياگازچۋندجا» جشس قۇرىلتايشىلارى قايرات بورانباەۆ پەن رومان ناحانوۆقا جانە «Qazaq Gaz» اق باسقارما توراعاسىنىڭ بۇرىنعى ورىنباسارى تاير جانۇزاققا سۇيىتىلعان مۇناي گازىن ساتىپ الۋ كەزىندە 14,5 ملرد تەڭگە ۇرلاۋ جانە قىلمىستىق كىرىستەردى زاڭداستىرۋ فاكتىلەرى بويىنشا قىلمىستىق ءىستى تەرگەۋدى اياقتادى»، - دەلىنگەن ۆەدومستۆو حابارلاماسىندا.

2022 جىلعى 23 جەلتوقساندا باس پروكۋراتۋرا ءىستى سوتتىڭ قاراۋىنا جىبەردى. ۇلتتىق كومپانياعا كەلتىرىلگەن زالال «Qazaq Gaz» اق شوتتارىنا اۋدارۋ ارقىلى تولىق كولەمدە وتەلدى.

اياقتالعان ءىس شەڭبەرىندە ازاماتتىق تالاپ قويۋ جانە مۇلىكتى تاركىلەۋ بولىگىندە ۇكىمنىڭ ورىندالۋىن قامتاماسىز ەتۋ ماقساتىندا ايىپتالۋشىلاردىڭ 38 ملرد تەڭگە سوماسىنداعى اقشالاي قاراجاتىنا، 15 جىلجىمايتىن مۇلىك وبەكتىسىنە، 3 اۆتوكولىك قۇرالىنا تىيىم سالىندى.

اگەنتتىك قايرات بورانباەۆقا جانە باسقا ادامدارعا قاتىستى گاز ەكسپورتى كەزىندە ۇرلاۋ جانە قىلمىستىق جولمەن الىنعان مۇلىكتى زاڭداستىرۋ فاكتىلەرى بويىنشا بولىنگەن ىستەر شەڭبەرىندە سوتقا دەيىنگى تەرگەۋدى جالعاستىرۋدا.

قپك-ءنىڭ 201-بابىنا سايكەس وزگە اقپارات جاريا ەتۋگە جاتپايدى.

ەسكە سالا كەتەيىك، قايرات بورانباەۆ 15 ناۋرىزدا قاماۋعا الىندى. ول كۆازيمەملەكەتتىك سەكتوردا اسا ءىرى مولشەردە قاراجات ۇرلادى دەگەن كۇدىككە ءىلىندى.

پىكىرلەر