وتكەن اپتادا جازاسى جەڭىلدەپ، تۇرمەدەن بوساتىلعان قايرات بورانباەۆتىڭ نەمەرە باۋىرى ءابىلحان بورانباەۆ پەن ودان پارا العان جەدەل ۋاكىل داۋرەن قازىبەكتى استانا قالاسىنىڭ قىلمىستىق ىستەر جونىندەگى اۋدانارالىق سوتى سوتتادى. بۇل تۋرالى sadaqmedia.kz جاريالادى، دەپ حابارلايدى “ادىرنا” ۇلتتىق پورتالى.
رەسمي مالىمەتتەرگە سۇيەنسەك، استانا قالاسىنىڭ قىلمىستىق ىستەر جونىندەگى اۋدانارالىق سوتى 19 قازان كۇنى وسى وقيعاعا قاتىستى قىلمىستىق ءىستى قاراعان.
ابىلحان بورانباەۆ جەدەل ۋاكىل داۋرەن قازىبەك پەن ونىڭ ارىپتەسى (كۇدىكتى تەرگەۋ كەزىندە قازا تاپقان، وعان قاتىستى ءىس توقتادى - اگەنتتىك) 1,6 ملن تەڭگە كولەمىندە پارا بەرگەن دەپ ايىپتالدى.
اقپارات بويىنشا، بۇل اقشانى العان داۋرەن قازىبەك پەن ونىڭ قازا بولعان ارىپتەسى تەرگەۋ ءۇشىن قاماۋعا الىنعان قايرات بورانباەۆقا ءموبيلدى بايلانىس بەرىپ، كەزدەسۋ وتكىزگەن.
سونىمەن قاتار، سوتتا دالەلدەنگەندەي، 22 قىركۇيەك قايرات بورانباەۆتىڭ تۋعان كۇنىندە تۇرمەگە الكوگولدى ىشىمدىك كىرگىزىپ، ءۇشىنشى تۇلعالارمەن پروتسەستىك ەمەس بايلانىسقا تۇسۋىنە زاڭسىز مۇمكىندىك بەرگەن.
سوت جەدەل ۋاكىل داۋرەن قازىبەكتى 7 جىلعا، ال، قايرات بورانباەۆتىڭ تۋىسى ءابىلحان بورانباەۆتى 4 جىل التى ايعا سوتتادى. شەشىم زاڭدى كۇشىنە ەنگەن جوق.
