قازاقستان بيلىگى شۆەيتساريادا بۇعاتتالعان 212 ميلليون اقش دوللارىنا قاتىستى شاعىمىنان باس تارتتى. وسىدان كەيىن شۆەيتساريانىڭ فەدەرالدىق قىلمىستىق سوتى بۇل قاراجاتتى شەشۋگە رۇقسات بەردى. اتالعان سوما سوتتالعان كاسىپكەر قايرات بورانباەۆتىڭ جارى شولپان بورانباەۆاعا تيەسىلى بولۋى مۇمكىن، دەپ حابارلايدى “ادىرنا” ۇلتتىق پورتالى «ۆلاست»-قا سىلتەپ.
2022 جىلدىڭ ماۋسىمىندا قازاقستان بيلىگى شۆەيتساريانىڭ باس پروكۋراتۋراسىنا بورانباەۆتار وتباسىنىڭ شوتتارى تۋرالى اقپارات سۇراتىپ، بانكتىك قۇجاتتاردى تالاپ ەتكەن. 2023 جىلدىڭ ماۋسىمىندا شۆەيتساريالىق سوت بۇل ەسەپشوتتاردى بۇعاتتاپ، قازاقستانعا قۇجاتتاردى جىبەرۋدى ماقۇلداعان بولاتىن.
الايدا، كەيىننەن قازاقستان بيلىگى بىرنەشە رەت رەسمي حات جولداپ، بۇل قاراجاتتىڭ زاڭسىز جولمەن كەلگەنىنە ناقتى دالەل جوق ەكەنىن مالىمدەدى. وسىعان بايلانىستى شۆەيتساريا سوتى 2025 جىلدىڭ قاڭتارىندا ەسەپشوتتارعا قاتىستى بارلىق شەكتەۋلەردى الىپ تاستاۋ تۋرالى شەشىم شىعاردى.
2023 جىلى قايرات بورانباەۆ «قازترانسگاز» كومپانياسىنان 14,5 ميلليارد تەڭگەنى جىمقىردى دەپ ايىپتالىپ، 6 جىلعا سوتتالعان ەدى. بىراق ول شارتتى تۇردە مەرزىمىنەن بۇرىن بوساپ شىعىپ، مەملەكەتكە اكتيۆتەرىن قايتارۋعا كەلىستى.
2024 جىلدىڭ مامىرىنا دەيىن ول جالپى قۇنى 134,5 ميلليارد تەڭگەنى قۇرايتىن بىرنەشە اكتيۆىن قايتاردى.
2021 جىلى Forbes جۋرنالى قايرات بورانباەۆتىڭ بايلىعىن $590 ميلليون دەپ باعالاعان. الايدا، 2022 جىلدان باستاپ ول Forbes رەيتينگتەرىنەن مۇلدەم ءتۇسىپ قالدى. بۇعان دەيىن بورانباەۆ «قايرات» فۋتبول كلۋبىنىڭ نەگىزگى يەسى بولعانى ايتىلعان ەدى.
