NIS túlekteri mektepke qaıta oraldy

2083
Adyrna.kz Telegram

Aqtaý qalasyndaǵy Nazarbaev Zııatkerlik mektebinde «Samgau» túlekter forýmy ótti. 

Alumni NIS birlestigi uıymdastyrǵan sharanyń basty maqsaty túlekter men oqýshylar arasynda baılanys ornatyp, Nazarbaev Zııatkerlik mektebi oqýshylarynyń kásibı damýyna úles qosý. Forým Astana, Almaty, Shymkent, Pavlodar, Taraz, Aqtaý, Óskemen, Semeı, Qostanaı, Atyraý, Qyzylorda qalasyndaǵy NIS mektepterinde ótti.

Forýmnyń ashylý saltanatynda Alumni NIS prezıdenti Janel Sabdenova «Giving» konepııasyna toqtalyp, oqýshylar men túlekterge onyń mańyzdylyǵyn túsindirdi. 

Aqtaýdaǵy NIS-tiń  alǵashqy túlekteri de bul sharadan tys qalmady. 2017 jyly Zııatkerlik mektep túlegi atanǵan Eset Sıdeshov «Samgau» túlekter forýmyna qatysyp, mektepke degen saǵynyshyn jetkizdi.

“Súıikti Nazarbaev Zııatkerlik mektebimniń túlegi atanǵanyma 5 jyl bolypty. Mektepten alǵan bilimimen Qazaqstandaǵy úzdik ýnıversıtettiń túlegi atandym. Búgin túlekter forýmy arqasynda mektepke qaıta oralyp, tálim bergen ustazdarymmen qaýyshqanyma qýanyshtymyn”,- deıdi 2017 jylǵy túlegi Eset Sıdeshov 

Eset mekteptiń alǵashqy túlekteriniń biri, ári  ózin ózi basqarý uıymynyń tuńǵysh prezıdenti bolǵan úzdik oqýshy. Ol 2021 jyly Qazaqstan-Brıtan tehnıkalyq ýnıversıtetin aıaqtap, qazirgi tańda Q.Sátbaev atyndaǵy Qazaq ulttyq tehnıkalyq ýnıversıtetinde magıstratýrada bilim alyp jatyr.

Forýmǵa qatysqan túlekter arasynda shetelde bilim alyp jatqan stýdentter de bar. Solardyń biri Aqtaýdaǵy NIS-tiń 2022 jylǵy túlegi Ámına Shaıdýllına. Ámına qazirgi tańda Shveıarııadaǵy Franklın ýnıversıtetinde bilim alyp jatyr.  

“Nazarbaev Zııatkerlik mektebi maǵan shetelde bilim alýyma múmkindik berdi. Sondyqtan endigi kezek bizge kelgen sekildi. «Samgau» forýmynyń aıasynda búgin Franklın ýnıversıtetinde alyp jatqan bilimimen, shetelge oqýǵa tapsyrýdaǵy tájirıbemmen oqýshylarmen bólistim”, - deıdi Ámına

Aıta keteıik, Ámına Shaıdýllına mektep tarıhynda shveıarııalyq ýnıversıtettiń shákirtaqysyna ıe bolǵan alǵashqy stýdent.

«Samgau» forýmynyń baǵdarlamasyna sáıkes túlekter ár túrli sala boıynsha sessııalar júrgizdi. Sessııada oqýǵa túsýmen qatar mamandyq pen ýnıversıtetti tańdaýdaǵy tájirıbelerimen bólisti. Shara sońynda zııatkerler men túlekter arasynda voleıboldan joldastyq kezdesý ótti. 

Pikirler