"استانادا وقۋشى ورنىنىڭ تاپشىلىعى 26 مىڭنان اسادى". بۇل تۋرالى قر وقۋ-اعارتۋ ءمينيسترى اسحات ايماعامبەتوۆ حابارلادى، دەپ جازادى "ادىرنا" ۇلتتىق پورتالى جازادى.
"ەلوردا ماڭىندا ورنالاسقان «لەسوزاۆود» اۋدانىنداعى №49 مەكتەپكە باردىم. مۇندا 1 300-دەن استام بالا وقيدى. مەكتەپتەگى قاۋىپسىزدىكتى قامتاماسىز ەتۋ بويىنشا جۇمىستارمەن تانىسىپ، وقۋ كابينەتتەرىن ارالادىم، كىتاپحانادا وقۋشىلارمەن جانە كىتاپحاناشىمەن اڭگىمەلەستىم. سونداي-اق ارىپتەستەرىممەن جۇمىس ماسەلەلەرىن تالقىلادىق", - دەپ جازدى مينيستر.
مينيستر «جايلى مەكتەپ» ۇلتتىق جوباسى اياسىندا جاڭا مەكتەپتەر سالىناتىنىنا توقتالىپ ءوتتى.
"استاناداعى ءبىلىم باسقارماسىنىڭ مەكتەپتەردە وقۋشىلار سارايىنىڭ فيليالدارى مەن باسقا دا قوسىمشا ءبىلىم بەرۋ ۇيىمدارىن اشۋ بويىنشا وڭ تاجىريبەسىن اتاپ وتكىم كەلەدى. مىسالى، بۇل مەكتەپتە اۆيامودەلدەۋ، بوكس، ۆولەيبول جانە ت.ب. ۇيىرمەلەر جۇمىس ىستەيدى. «جايلى مەكتەپ» ۇلتتىق جوباسىن ىسكە اسىرۋ اياسىندا جاڭا مەكتەپتەر سالۋ جوسپارلانىپ وتىرعان بىرنەشە ورىنعا باردىق. بۇل كەرەي جانە جانىبەك حاندار كوشەسىندەگى (ارقايسىسى 2 000 وقۋشى ورنى), تولە بي كوشەسىندەگى (2 000 وقۋشى ورنى) جانە بايتۇرسىنوۆ 7 كوشەسىندەگى (600 وقۋشى ورنى) مەكتەپتەر", - دەيدى مينيستر.
ايماعامبەتوۆتىڭ ايتۋىنشا، ەلوردادا وقۋشى ورنىنىڭ تاپشىلىعى 26 مىڭنان اسادى.
"قازىر قالادا وقۋشى ورنىنىڭ تاپشىلىعى 26 مىڭنان اسادى. بۇل ماسەلەنى شەشۋ ءۇشىن 2024-2025 جىلدارعا ارنالعان ۇلتتىق جوبا شەڭبەرىندە ەكىاۋىسىمدا 85 مىڭعا جۋىق وقۋشى ورنىن قامتاماسىز ەتەتىن 24 مەكتەپتىڭ قۇرىلىسىن اياقتاۋ جوسپارلانعان. باسىم كوپشىلىگى 2024 سالىنىپ بىتەدى. ۇلتتىق جوبانى ىسكە اسىرۋعا جەتەكشىلىك ەتەتىن استانا اكىمدىگىنىڭ وكىلدەرى جەر ۋچاسكەلەرىن ءبولۋ، جسق دايىنداۋ، ينجەنەرلىك ينفراقۇرىلىم جانە ت.ب. ماسەلەلەردى شەشىپ جاتقانىن اتاپ كەتكىم كەلەدى. بولاشاقتا ەلوردادا ءبىلىم بەرۋ وبەكتىلەرىن سالۋ ءۇشىن 102 جەر ۋچاسكەسىن ءبولۋ جونىندەگى شەشىم دە ۋاقىتىلى قابىلداندى. پرەزيدەنتتىڭ جاڭا ۇلتتىق جوبانى ىسكە اسىرۋ جونىندەگى تاپسىرماسى اياسىندا الداعى ۋاقىتتا ءۇشاۋىسىمدى وقىتۋ ماسەلەسى عانا ەمەس، وقۋشى ورىندارىنىڭ تاپشىلىعى دا تولىق شەشىلەدى", - دەيدى ايماعامبەتوۆ.
"ادىرنا" ۇلتتىق پورتالى
