30 جىلدىق تاريحىمىزدا «اسىمىزدى ءىشىپ، استاۋىمىزعا تۇكىرگەندەر» از بولعان جوق. بۇگىنگى اڭگىمەمىز سولاردىڭ كوشىن باستاپ تۇرعان اعايىندى الەكساندر جانە ميحايل سۋتياگينسكيلەر جايلى بولماق.
اعايىندى الاياقتار 2006 جىلى بيلىكتى اينالشىقتاپ اقىرى دەگەندەرىنە كوندىردى. ولار ەلىمىزدە «بيوحيم» جانە «سيليتسيۋم» زاۋىتتارىن سالماق بولىپ، سول زاۋىتتارعا بيلىكتىڭ ارالاسۋىمەن قاراجات الدى. اعايىندىلاردىڭ جوباسىنا «قازاقستاننىڭ دامۋ بانكى» 60 ملن دوللار، ال «الفا-بانك» 17,5 ملن دوللار، «تسەنتركرەديت بانكى» 10,6 ملن دوللار جانە «بتا بانكى» اقشا ءبولدى. بۇل بارلىق سالىمداردىڭ 10 پايىزىنان استامى عانا بولاتىن.
ناتيجەسىندە، ءبارى جاقسى باستالدى. 2006 جىلى «بيوحيم» زاۋىتى سالىنىپ، نازارباەۆتىڭ ءوزى كەلىپ اشىپ بەردى. نەگىزىندە، نارىقتى بيووتىنمەن تولتىرۋى قاجەت بولعان كاسىپورىننىڭ از ۋاقىتتا ماسەلەسى ءمالىم بولا باستادى. العاشىندا ەلەكتر قۋاتىمەن، سوڭىنان ءونىمدى ساتۋعا قاتىستى ماسەلەلەرگە مالىنعان كاسىپورىن ءتيىمسىز بولىپ شىقتى. اقىرى جوبا بانكروتقا ۇشىرادى. سالىقتى سىلتاۋراتقان اعايىندى سۋتياگينسكيلەردىڭ كوزدەگەنى دە وسى بولدى ما دەرسىڭ… سەبەبى جوبانىڭ قۇرىلىسىنا قىرۋار قارجى جۇمسالدى عوي. ناتيجەسىندە، زاۋىت قازاقستاننىڭ ينۆەستيتسيالىق قورىنا كوشتى. كەيىننەن مەملەكەت قاتىساتىن كومپانياعا 20 ميلليون دوللارعا ارەڭ ساتىلدى.
سۋتياگينسكيلەر مۇنىمەن توقتاعان جوق. ولار تاعى ءبىر «سيليتسيۋم» زاۋىتىن سالۋعا كوشتى. وندا دا ءوز قارجىلارىنا ەمەس، ەل قارجىسىنا. تاعى دا «قازاقستاننىڭ دامۋ بانكى» مەن سول كەزدە مۇحتار ءابليازوۆ باسشىلىق ەتەتىن «بتا بانكى» اقشا سالدى. سايكەسىنشە، سۋتياگينسكيلەردىڭ سالماقتى سانالعان «سيليتسيۋم» جوباسى دا ءساتسىز اياقتالىپ، بانكروتقا ۇشىرادى. نەسيە قايتارىلمادى. بۇل جوبالاردان «قازاقستاننىڭ دامۋ بانكى» مەن «بتا بانكى» وراسان زور شىعىن كوردى. سوڭىنان اعايىندىلاردىڭ ۇلكەنى الەكساندر سۋتياگينسكي ادام ولتىرۋگە وقتالعانى ءۇشىن، ياعني ادام ولتىرۋگە تاپسىرىس بەرگەنى ءۇشىن 12 جىل ارقالادى. ال كىشىسى سول كۇيدە ءىزىن جوعالتتى. سودان بەرى ءۇنسىز كەتكەن ميحايل سۋتياگينسكي جاقىندا كورىنىس بەردى. ارينە، قازاقستاندا ەمەس. ول جاقىندا پسكوۆ وبلىسىندا ءپۋتيننىڭ ءوزى ونلاين قوسىلىپ، اشىپ بەرگەن «تيتان-پوليمەر» زاۋىتىنىڭ ديرەكتورلار كەڭەسىنىڭ توراعاسى بولىپ شىقتى. بۇل رەتتە قازاقستاننىڭ ميلليونداعان قارجىسىن جىمقىرىپ، ەلدەن تابانىن جالتىراتقان سۋتياگينسكيدىڭ ويدا جوقتا «تيتان-پوليمەر» زاۋىتىنىڭ ينۆەستورى بولىپ شىعا كەلگەنى ەسىمىزدەن تاندىردى. ويكەنى مۇنداي دەڭگەيدەگى الاياقتى ءپۋتيننىڭ بىلمەي قالۋى “كورمەس-تۇيەنى كورمەستىڭ” كەبى ەمەس پە؟
