بىرقاتار جۋرناليستىك زەرتتەۋلەردىڭ اۆتورى، "داۋ-دامايسىز" باعدارلاماسىنىڭ جۇرگىزۋشىسى جازيرا بەگالى حالىقتى الاياقتىقتىڭ جاڭا تۇرىنەن ساقتاندىردى. سوڭعى كەزدەرى جالعان ەنەلەر "قىزىم، سەنى كەلىن قىلىپ الامىن" دەپ تۇرمىس قۇرماعان قىزداردىڭ باسىن شىر اينالدىرىپ، ولارعا بانكتەن نەسيە الدىرتىپ الاتىن بولعان. اۆتور مۇنداي وقيعالاردىڭ سوڭعى كەزدەرى جيىلەپ كەتكەنىن جازدى. بۇل جايلى "ادىرنا" ۇلتتىق پورتالى حابارلايدى.
جۋرناليست الاياق ''ەنەلەردىڭ'' ارەكەتىن تومەندەگىدەي باياندايدى.
- سوڭعى كەزدەرى كەزەگىڭدى جىلجىتىپ، ءۇي الىپ بەرەمىن، بيزنەس اشۋ، گرانت الۋ، جۇمىسقا ورنالاسۋعا كومەك بەرەمىن، شەتەلدىك تولەگەندەر جىبەرگەن سىيلىقتى الۋ ءۇشىن دە الدانعان جۇرتتان شاعىم جيىلەپ كەتتى. جىلاعاندا ەتەگى جاسقا تولعان حالىقتى سان سوقتىرعان سۋايتتارعا پوليتسيا نەگە ءىس قوزعامايدى؟ الاياقتاردىڭ بۇل ارەكەتىن توقتاتۋ ءۇشىن حالىقتىڭ قارجىلىق، قۇقىقتىق ساۋاتىن جەتىلدىرۋ كەرەك. ون جىل بۇرىن بانكتەر وسىنداي باستاما كوتەرگەن. وزدەرىنە ءتيىمسىز بولدى ما، سول جوبا قۇمعا سىڭگەن سۋداي بولدى، - دەپ اۆتور ءۇي بولۋدى جەلەۋ ەتىپ، تۇرمىسقا شىعۋعا ىقىلاستى جانداردى سان سوقتىرعان الاياقتاردىڭ ارەكەتىنەن حابار بەردى.
مۇنداي وقيعانى شىنايى ومىردەن العا تارتىپ، ەل ەستىمەگەن جاڭالىقپەن ءبولىستى:
ەندى تۇرعىنداردى الاياقتاردان ساقتاندىرۋ ءۇشىن نە ىستەۋ كەرەك؟ الاياقتاردىڭ ايلاسى سانالۋان. ولار جاساعان ءىسىن قىلمىس دەپ ويلامايدى. كوپ جاعدايدا الدانعان جاندار شاعىم، ارىزدى پوليتسيا قارامايدى دەيدى... ەندى قىزداردى كەلىن قىلامىن دەپ بانكتەن نەسيە قارىز الدىرۋدى كاسىپكە اينالدىرعان الاياق ەنەلەر پايدا بولىپتى. ابايلاڭىزدار.. مەن تاراز قالاسىنىڭ تۇرعىنىمىن. ونلاين ارقىلى تانىسىپ، سويلەسىپ جۇرگەن جىگىتىم الماتىعا شاقىردى. ول تۇرمەدەن حات جازىپتى. ماعان ونىڭ شەشەسى 2 500 000 تەڭگە بانكتەن نەسيە الدىردى. كەلىن قىلامىن دەپ سەندىردى. جىگىتتىڭ اناسى اقشانى العان سوڭ ۇيىنەن قۋىپ جىبەردى. وتىنەمىن، ماعان كومەكتەسىڭىزدەرشى. تۇرمەدەگى قىلمىسكەرگە عاشىق بولىپ، ونىڭ شەشەسىنە قوماقتى قارجىنى نەسيەگە الىپ بەرۋگە ماحاببات ءماجبۇر ەتتى دەيدى.. ءسىز سەنەسىز بە؟ ءالى ەنەسى اتانباعان بوتەن ايەلگە اقشانى بەرگەندە قولحات تا الماعان... ەندى جىلاپ وتىر، - دەدى جۋرناليست.
وقىرماندار سەزىم جەتەگىندە سان سوعىپ قالعان كەيىپكەردىڭ تاعدىرىنا الاڭداۋلى. ولار:
"قارجىلىق جانە قۇقىقتىق ساۋاتتىلىق بويىنشا قانداي جۇمىستار جۇرگىزسە دە ارتىق ەمەس. ۇكىمەت وعان قارجى بولگەننەن ۇتىلماس ەدى. تەك ماقساتتى جۇمسالماي، ول قارجى دا تالان-تاراج بوپ جاتىر عوي", "وسىلاي الدانعاندار كوبەيىپ كەتتى. الاياقتارعا قارسى بيلىك قاتال زاڭ دايىنداۋ كەرەك" دەپ جازىپ جاتىر.
"ادىرنا" ۇلتتىق پورتالى
