فوتو:baibolsyn.kz
قازاقستان جىلقى سانى بويىنشا الەمدىك رەيتينگتە ءتورتىنشى ورىنعا تۇراقتادى. بۇل تۋرالى Ranking.kz جازدى، دەپ حابارلايدى “ادىرنا”.
IV دۇنيەجۇزىلىك كوشپەندىلەر ويىندارىندا قازاقستان قۇراماسى 74 مەدال جەڭىپ العان ەدى. ونىڭ ىشىندە 32 مەدال – التىن. ۇلتتىق قۇراما اسىرەسە ات سپورتى باعىتىنداعى جارىستاردا ۇزدىك ناتيجە كورسەتكەن.
بۇۇ-نىڭ ازىق-تۇلىك جانە اۋىل شارۋاشىلىعى ۇيىمىنىڭ (FAO) دەرەكتەرىنە سايكەس، الەمدە جىلقى سانى ەڭ كوپ ەلدەردىڭ قاتارىندا قازاقستان دا بار.
رەيتينگتەگى العاشقى بەس ەل:
- مەكسيكا – 6,4 ملن باس;
- برازيليا – 5,7 ملن باس;
- موڭعوليا – 4,7 ملن باس;
- قازاقستان – 4,4 ملن باس;
- قىتاي – 3,5 ملن باس.
2025 جىلعا قاراي قازاقستانداعى جىلقى سانى 4,6 ملن باسقا جەتكەن. وسىلايشا ەلىمىز جىلقى سانى بويىنشا الەمدەگى ءىرى مەملەكەتتەردىڭ بىرىنە اينالىپ وتىر.
قازاقستان ورتالىق ازيا ەلدەرى اراسىندا جىلقى سانى بويىنشا ايقىن كوشباسشى سانالادى.
ماسەلەن، قىرعىزستان الەمدىك رەيتينگتە 17-ورىندا تۇر. ەلدەگى جىلقى سانى – 553,5 مىڭ باس. وزبەكستان 283 مىڭ جىلقىمەن 30-ورىندا بولسا، تاجىكستان 92 مىڭ باس كورسەتكىشىمەن 51-ورىنعا جايعاسقان. ال تۇرىكمەنستاندا جىلقى سانى 27,6 مىڭ باستى قۇرايدى.
قازاقستانداعى جىلقى سانى دا سوڭعى بەس جىلدا ايتارلىقتاي وسكەن. 2020 جىلى ەلدە شامامەن 3,1 ملن جىلقى بولسا، 2025 جىلى بۇل كورسەتكىش 4,6 ملن باسقا جەتتى. وسىلايشا بەس جىل ىشىندە جىلقى سانى شامامەن 48,4 پايىزعا ارتقان.
ال قىرعىزستاندا ءدال وسى كەزەڭدەگى ءوسىم 4,9 پايىزدى قۇراعان.
قازاقستاندا جىلقى شارۋاشىلىعى ءبىر عانا وڭىرگە شوعىرلانباعان. ەلىمىزدىڭ ءار ايماعىندا ءىرى جىلقى شارۋاشىلىقتارى بار.
جىلقى سانى بويىنشا الدىڭعى قاتارداعى وڭىرلەر:
- تۇركىستان وبلىسى – 499,9 مىڭ باس;
- اباي وبلىسى – 409,3 مىڭ باس;
- اقتوبە وبلىسى – 399,7 مىڭ باس;
- قاراعاندى وبلىسى – 399 مىڭ باس.
ساراپشىلاردىڭ پىكىرىنشە، جىلقى شارۋاشىلىعىنىڭ دامۋىنا قازاقستاننىڭ كەڭ جايىلىمدىق جەرلەرى مەن مەملەكەتتىك قولداۋ شارالارى اسەر ەتىپ وتىر. ەلدەگى جايىلىمداردىڭ جالپى اۋماعى 2,7 ملن شارشى شاقىرىمنان اسادى.
جىلقى شارۋاشىلىعىنا سالىناتىن ينۆەستيتسيا كولەمى دە بىرنەشە ەسەگە وسكەن. ەگەر 2020 جىلى جىلقى ءوسىرۋ سالاسىنداعى نەگىزگى كاپيتالعا سالىنعان ينۆەستيتسيا 3,5 ملرد تەڭگە بولسا، 2025 جىلى بۇل كورسەتكىش 26,2 ملرد تەڭگەگە جەتتى.
ال ينۆەستيتسيا كولەمىنىڭ ەڭ جوعارى كورسەتكىشى 2023 جىلى تىركەلىپ، 49 ملرد تەڭگەنى قۇراعان.
قارجى نەگىزىنەن اۋىل شارۋاشىلىعى تەحنيكاسىن ساتىپ الۋعا، اسىل تۇقىمدى جىلقى سانىن كوبەيتۋگە جانە شارۋاشىلىق نىساندارىن سالۋعا باعىتتالۋدا.
جىلقى سانىنىڭ ءوسۋى مەن سالاعا قۇيىلاتىن ينۆەستيتسيانىڭ ارتۋى قازاقستانداعى ءداستۇرلى جىلقى شارۋاشىلىعىنىڭ جاڭا دەڭگەيگە كوتەرىلىپ كەلە جاتقانىن كورسەتەدى. بۇل ءوز كەزەگىندە ۇلتتىق ات سپورتىنىڭ دامۋىنا جانە كوشپەندىلەر مادەنيەتىن حالىقارالىق دەڭگەيدە تانىتۋعا مۇمكىندىك بەرىپ وتىر.
