بۇگىن – ءانشى، كسرو جانە قازاقستان حالىق ءارتىسى، قازاقستاننىڭ ەڭبەك سىڭىرگەن ءارتىسى، كسرو جانە قازاقستان مەملەكەتتىك سىيلىعىنىڭ لاۋرەاتى، سوتسياليستىك ەڭبەك ەرى بيبىگۇل تولەگەنوۆانىڭ تۋعان كۇنى، دەپ حابارلايدى “ادىرنا” ۇلتتىق پورتالى.
بيبىگۇل تولەگەنوۆا – 1929 جىلى 16 جەلتوقساندا سەمەي قالاسىندا دۇنيەگە كەلگەن. اكەسى سكريپكادا ويناپ، اناسى ءان سالعان جانۇيادا ارقاشان اۋەزدى اۋەن ەستىلگەن. بىراق، 1937 جىلى اكەسى احمەت قاماۋعا الىنىپ، ءىز-ءتۇزسىز جوعالىپ كەتەدى.
كەشكى مەكتەپتىڭ 7-سىنىبىندا وقيتىن بيبىگۇل ەڭبەككە ەرتە ارالاسىپ، اۋرۋشاڭ اناسىنا قولعابىس بولىپ، ەت كومبيناتىنىڭ كلۋبىنا كينومەحانيك بولىپ ورنالاسادى. انسۇيەر قىزدىڭ باستى ماقساتى - جۇمىس بارىسىندا ونەرگە جاقىن بولىپ، كوركەمونەرپازدار ۇيىرمەسىنە قاتىسۋ ەدى. الايدا، 1945 جىلى ۇيدەگى قارجى ماسەلەسىنىڭ قيىنداۋىنا بايلانىستى ول ەت كومبيناتىنىڭ تەمىر-قالبىرلىق تسەحىنا اۋىسادى.
II دۇنيەجۇزىلىك سوعىس جىلدارىندا سەمەيگە، سونداي-اق، قازاقستاننىڭ بارلىق قالالارىنا استانادان عالىمدار، ادەبيەتشىلەر، مۋزىكانتتار كوشىرىلدى. كوركەمونەرپازدار كورسەتىلىمدەرىنىڭ بىرىندە بيبىگۇل تولەگەنوۆانى كەڭەس جازۋشىسى گ. ي. سەرەبرياكوۆا بايقاپ، وعان العاشقى مۋزىكا ساباقتارىن بەردى.
1951 جىلى الماتى كونسەرۆاتورياسىنىڭ ستۋدەنتىن قازاق راديوسى سوليست بولۋعا جۇمىسقا شاقىرادى. ال 1954 جىلى ۇستازى ن.ن. سامىشينومەن بىرگە بۇكىلوداقتىق ۆوكال كونفەرەنتسياسىنا قاتىسۋ ءۇشىن لەنينگرادقا (قازىرگى سانكت-پەتەربۋرگ قالاسى) اتتانادى. بۇل شارا بيبىگۇلدىڭ ونەردەگى جولىن اشادى.
1954 جىلى كونسەرۆاتوريانى اياقتاعان سوڭ، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ترۋپپاسىنا قابىلدانىپ، ەكى جىلدان سوڭ، قۇرمانعازى اتىنداعى ۇلتتىق اسپاپتار وركەسترىنىڭ ءانشىسى بولادى. 1971 جىلعا دەيىن بيبىگۇل تولەگەنوۆا وركەسترمەن بىرگە قازاقستان مەن كەڭەس وداعىنىڭ بار ايماعىن گاسترولدىك ساپارمەن ارالايدى.
1958 جىلى بۇكىلوداقتىق ەسترادا ارتىستەرىنىڭ بايقاۋىندا لاۋرەات اتانىپ، 1967 جىلى 6 ماۋسىمدا «كسرو حالىق ءارتىسى» اتاعىن يەلەنەدى.
1991 جىلدىڭ 21 جەلتوقسانىندا كسرو پرەزيدەنتىنىڭ قاۋلىسىمەن بيبىگۇل تولەگەنوۆاعا مۋزىكا ونەرىنىڭ دامۋىنا قوسقان ۇلكەن ۇلەسى ءۇشىن لەنين اتىنداعى وردەنى جانە «بالعا مەن وراق» مەدالىمەن قاتار سوتسياليستىك ەڭبەك ەرى اتاعى بەرىلدى. «ەڭبەك قىزىل تۋ» وردەنىمەن (3.01.1959 ج), لەنين اتىنداعى وردەنمەن ەكى مارتە ماراپاتتالعان. كسرو مەملەكەتتىك سىيلىعىنىڭ لاۋرەاتى (1970), كۇلاش بايسەيىتوۆا اتىنداعى قازاق كسرو مەملەكەتتىڭ سىيلىعىنىڭ لاۋرەاتى (1966).
