15 جەلتوقساندا كينەماتوگرافيا تاريحىنداعى ەڭ جوعارى كاسسالى جانە كورەرمەندەر تاراپىنان زور سۇيىسپەنشىلىككە يە بولعان «اۆاتار» ءفيلمى جاڭارتىلعان بەينەدە، وڭدەلگەن دىبىسپەن مەملەكەتتىك تىلدە قالىڭ كورەرمەنگە جول تارتتى. الايدا تۋىندىنىڭ قازاق تىلىندەگى سەانسىنا قويىلعان ۋاقىت كوپشىلىكتىڭ نارازىلىعىن تۋدىردى، دەپ حابارلايدى «ادىرنا» ءتىلشىسى.
بەلگىلى جۋرناليست ماقسات تولىقبايدىڭ ايتۋىنشا، قازاقشا سويلەيتىن «اۆاتار» كومەككە مۇقتاج.
«فيلم كۇندىز، ەل جۇمىستا جۇرگەن ۋاقىتقا، 14:30-عا ءبىر رەت قويىلىپتى. 20-دان استام كورسەتىلىمنىڭ تەك ءبىرى عانا قازاقشا! ورىس تىلىندە بولماسىن دەپ وتىرعان جوقپىز، بىراق كەم دەگەندە تەپە تەڭدىك ساياساتى بولۋى كەرەك قوي؟! وسىدان كەيىن، قازاقشا دۋبلياجعا ەشكىم بارمايدى دەپ قورىتىندى شىعارا سالا ما؟ بۇل استە دۇرىس ەمەس. ىڭعايى كەلسە، سەانستى تاڭدايىق، بارايىق. سۇرانىستىڭ بارىن كورسىن»،—دەدى ول.
بۇل پىكىردى جەلى قولدانۋشىلارى دا قولدادى.
«الماتىدا اۆاتاردىڭ ورىسشاسى 1100 تەڭگەدەن، قازاقشاسى 2000 تەڭگەدەن باستالادى. باعادا دا ديسكريميناتسيا. ءبىر كەم دۇنيە..»، «جەكەشەلەنىپ كەتكەن كينوتەاترلار مەن قوجايىنى بەلگىسىز جاڭا كينوتەاترلاردىڭ ماسەلەسىن قايتادان قارۋ كەرەك!»— دەپ پىكىر ءبىلدىردى وقىرماندار.
