قىرعىز پارلامەنتىنىڭ توراعاسى مينيسترگە ورىس تىلىندە بايانداما جاساۋعا رۇقسات بەرمەدى (ۆيدەو)

3469
Adyrna.kz Telegram

قىرعىزستاننىڭ پارلامەنت سپيكەرى نۇرلانبەك شاكيەۆ جوعارعى كەڭەستىڭ وتىرىسىندا تابيعي رەسۋرستار، ەكولوگيا جانە تەحنيكالىق باقىلاۋ ءمينيسترى دينارا قۇتمانوۆاعا ورىس تىلىندە بايانداما جاساۋعا رۇقسات بەرمەدى، دەپ حابارلايدى «ادىرنا» ءتىلشىسى.

«كەشىرىڭىز، ورىسشا بايانداما جاساۋعا كىمنەن رۇقسات سۇرادىڭىز؟ نەگە قىرعىزشا ەمەس؟»،— دەپ توراعا ءمينيستردىڭ ءسوزىن ءبولدى.

دينارا قۇتمانوۆانىڭ «توراعادان» دەگەن جاۋابىنا نۇرلانبەك شاكيەۆ: «قازىر كورىپ تۇرمىن. ءبىزدىڭ ەلدە وسىنداي ءتارتىپ بار، مىندەتتى تۇردە مەملەكەتتىك تىلدە بايانداما جاساۋ كەرەك. ءسىز رۇقسات سۇراماي، وقۋدى جالعاستىرا بەرەسىز بە؟ قىرعىزشا جاساڭىز»، – دەدى.

ءارى قاراي مينيستر ءسوزىن مەملەكەتتىك تىلدە جالعاستىردى.

ايتا كەتەيىك، جيىندا بىشكەكتەگى اۋانىڭ لاستانۋى ماسەلەسى تالقىلانىپ، تابيعي رەسۋرستار، ەكولوگيا جانە تەحنيكالىق باقىلاۋ ءمينيسترى اتقارىلىپ جاتقان شارالارعا توقتالدى.

پىكىرلەر