بەلگىلى ونەر قايراتكەرى، قازاقتىڭ دارىندى بالەتمەيستەرى بولات ايۋحانوۆ ومىردەن وزدى. سۋىت حابار جايلى تەارت ونەرىنىڭ مايتالمانى، يمپرەساريو ەلبرۋس يمامباەۆ حابار ايتتى. بۇل جايلى "ادىرنا" ۇلتتىق پورتالى جازدى.
سەكسەن بەس جاسقا قاراعان شاعىندا بەلگىلى بالەتمەيستەر، ءبيشى، ونەر تالاپكەرلەرىنىڭ ۇلاعاتتى ۇستازى بولات ايۋحانوۆ ومىردەن ءوتتى. بولات ايۋحانوۆ ماعىنالى عۇمىر كەشىپ، قازاق بالەت ونەرىنە ۇشان-تەڭىز ۇلەس قوستى.
بولات عازيزۇلى سەمەيدە 1938 جىلى دۇنيەگە كەلگەن. 1955 جىلى الماتى حورەوگرافيالىق ۋچيليششەسىن، 1957 جىلى لەنينگرادتىڭ ا. يا. ۆاگانوۆا اتىنداعى بي اكادەمياسىن بىتىرگەن. قازاق وپەرا جانە بالەت تەاترىنىڭ ءبيشىسى بولادى (1957 – 1959). 1959 – 1964 جىلدارى گيتيس-ءتىڭ بالەتمەيستەرلىك بولىمىندە وقيدى. 1967 جىلى “الماتىنىڭ جاس بالەتى” ءانسامبلىن قۇردى. سول جىلدان باستاپ وسى ءانسامبلدىڭ بيلەرى مەن حورەوگرافيالىق مينياتيۋرالاردى، كومپوزيتسيالاردى (“اققۋ”، “ايتىس”، “اڭشىلار ءبيى”), ءبىر، ەكى اكتىلى بالەتتەردى ساحناعا قويدى. سونداي-اق برۋسيلوۆسكيدىڭ “قىز جىبەك” (ش. جيەنقۇلوۆامەن بىرگە), د. شوستاكوۆيچتىڭ 4-سيمفونياسى بويىنشا “قىلمىس پەن جازا”، پ. چايكوۆسكيدىڭ “ەۆگەني ونەگين” ت. ب. بالەتى نەگىزىندە قويىلعان گران پا (جەكە ءوزىنىڭ حورەوگرافيالىق بولجامدارى) ءتارىزدى جۇمىستارى قازاق بالەتىنىڭ عانا ەمەس، دۇنيە جۇزىلىك بالەت تاريحىنا ەنگەن جاڭالىقتارى بولدى. سوڭعى جىلدارى قويعان “ەديت پياف – فرانتسيانىڭ رۋحى” اتتى سپەكتاكلى سىنشىلار مەن مامانداردىڭ جوعارى باعاسىنا يە بولدى. قازاقستاننىڭ حالىق ءارتيسى (1973).
سونىمەن قاتار، بولات ايۋحانوۆ “مەنىڭ بالەتىم”، “سەزىمدەر ءومىربايانى” كىتاپتارىن جازىپ، جارىققا شىعاردى.
وتاندىق بالەت ارتيستەرىن تاربيەلەپ شىعارۋعا دا كوپ ۇلەس قوستى. ونىڭ شاكىرتى ل. الپيەۆا 1997 جىلى ۆەنادا وتكەن حالىقارالىق بالەت ارتيستەرى كونكۋرسىنىڭ 1-سىيلىعىن يەمدەندى.
"ادىرنا" ۇلتتىق پورتالىنىڭ اتىنان قايراتكەردىڭ تۋعان-تۋىسقاندارىنا، زامانداستارى مەن شاكىرتتەرىنە قايعىرا وتىرىپ كوڭىل ايتامىز. مارقۇمنىڭ يمان بايلىعى كەمەل بولسىن!
