№36 مەكتەپتە وقۋشىلار اراسىندا جانجال شىعىپ، سوڭى توبەلەسكە ۇلاسقان، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
وسى جاعدايدان كەيىن اتا-انالار مەكتەپتەگى احۋالدىڭ كۇرت ناشارلاعانىن ايتىپ، دابىل قاقتى. ولاردىڭ سوزىنشە، مەكتەپ اكىمشىلىگى وقيعانى اشىق ءارى ءادىل تۇردە تەكسەرۋدىڭ ورنىنا، كەرىسىنشە، كەيبىر وقۋشىلارعا قىسىم كورسەتكەن.
اتا-انالاردىڭ مالىمدەۋىنشە، توبەلەسكە قاتىستى بەينەجازبالاردى وقۋشىلاردىڭ تەلەفوندارىنان وشىرۋگە ارەكەت جاسالعان. بۇل جاعداي كوپشىلىكتىڭ نارازىلىعىن تۋدىرىپ، مەكتەپ باسشىلىعىنىڭ ارەكەتىنە كۇمان كەلتىرگەن.
«وقۋشىلار اكىمشىلىك تاراپىنان قىسىم كورىپ جاتىر. بۇل بالالاردىڭ پسيحولوگيالىق جاعدايىنا كەرى اسەر ەتىپ، مەكتەپتەگى قاۋىپسىزدىك سەزىمىن تومەندەتەدى. ءبىز اتا-انالار رەتىندە مۇنداي جاعدايدان شارشادىق. مەكتەپ ديرەكتورى ءوز مىندەتىن ءتيىستى دەڭگەيدە اتقارا الماي وتىر دەپ ەسەپتەيمىز جانە ونىڭ قىزمەتتەن كەتۋىن تالاپ ەتەمىز»، – دەلىنگەن اتا-انالاردىڭ ۇندەۋىندە.
قالالىق ءبىلىم باسقارماسى جاعدايعا قاتىستى تۇسىنىكتەمە بەردى. ولاردىڭ مالىمەتىنشە، توبەلەسكە قاتىسقان وقۋشىلار مەكتەپىشىلىك ەسەپكە الىنىپ، ولارمەن پروفيلاكتيكالىق جۇمىستار جۇرگىزىلگەن. سونىمەن قاتار، وقۋشىلارعا پسيحولوگتاردىڭ كومەگى ۇيىمداستىرىلعان. مەكتەپ باسشىلىعىنا تارتىپتىك جازا رەتىندە سوگىس جاريالانعان. ال وقيعاعا قاتىسى بار وقۋشىلاردىڭ اتا-انالارى كامەلەتكە تولماعانداردى تاربيەلەۋ مىندەتتەرىن دۇرىس ورىنداماعانى ءۇشىن جاۋاپكەرشىلىككە تارتىلعان.
