14 jeltoqsan kúni Astana qalasynda Qazaqstan men Ispanııa arasyndaǵy dıplomatııalyq qatynastarǵa 30 jyl tolýyna oraı, tanymal ıspan jazýshysynyń qatysýymen ádebı kesh ótedi, dep jazady "Adyrna" ulttyq portaly.
Haver Moro – bestsellerge aınalǵan «Pasión India» kitabynyń avtory. Bul týyndy 22 tilge aýdarylyp, álem oqyrmandary arasynda úlken suranysqa ıe bolǵan. Qalamger otyzdan asa eńbek jazyp, ádebıet salasynda «Premio Planeta», «Christopher Award» sııaqty júldelerdi ıelengen.
Ispanııa – Qazaqstannyń táýelsizdigin moıyndaǵan jáne onymen strategııalyq seriktestik týraly kelisimge qol qoıǵan Eýropadaǵy alǵashqy elderdiń biri. Qazaq ádebıeti men mádenıetine ıspan halqynyń kózqarasy erekshe. Oǵan dálel retinde qazaq ádebıetin, qazaq poezııasyn ıspan jurtshylyǵyna tanytqan belgili jazýshy Hýsto Horhe Padrondy atap ótýge bolady. Hýsto Horhe qazaq aqyndary haqynda jazǵan maqalalarynda qazaq poezııasy týraly oı qozǵaýy, ádebıetimizdi ıspan jurtyna jetkizýi eki el arasynda ádebı baılanysty qalyptastyrdy. Qazaq ádebıeti jańa qatynastar men kózqarastarǵa jol ashyp, 2015 jyly Hýsto Horheniń «Tozaq sheńberleri» («Los circculos del infirno») atty kitaby aqyn Tanakóz Tolqynqyzynyń aýdarmasymen ıspan jáne qazaq tilderinde basylyp shyqty. Al 2017 jyly «Qazaq aqyndarynyń antologııasy» atty kólemdi eńbek alǵash ret ıspan tiline aýdarylyp, kitaptyń tusaýkeseri Madrıd qalasynda ótti.
Sonymen qatar ádebı kezdesýde aqyn, Qazaqstannyń eńbek sińirgen qaıratkeri, Halyqaralyq «Alash» ádebı syılyǵynyń ıegeri, «Daryn» Memlekettik jastar syılyǵynyń laýreaty, Qazaqstan Jazýshylar odaǵy nyń tóraǵasy Dáýletkereı Kápulynyń «Balbal zary» (ıs. «El llanto del balbal») atty ıspan tiline aýdarylǵan kitabynyń tusaýkeseri ótedi.
Atalmysh sharaǵa Ispanııa Koroldiginiń Qazaqstandaǵy Tótenshe jáne Ókiletti elshisi Horhe Ýrbıola Lopes de Montenegro jáne Álibek Asqaruly, Janat Áskerbekqyzy, Ońaıgúl Turjan, Tanakóz Tolqynqyzy, Oljas Qasym, Erbol Beıilhan syndy qalamgerler qatysady.
Uıymdastyrýshylar: Ispanııa memleketiniń Qazaqstandaǵy elshiligi, Qazaqstan Jazýshylar odaǵy Astana qalalyq fılıaly, Ulttyq akademııalyq kitaphana jáne «Folıant» baspasy
Esterińizge salsaq, Folıant baspasynan ıspandyq jazýshylar – Artýro Peres-Reverteniń «Qursaý nemese ólim ústindegi oıyn», Mıgel de Servantestiń «Don Kıhot» romandary, Rosıo Bonılıanyń balalarǵa arnalǵan «Kórshiler», «Torǵaı bolǵym kelmeıdi», «Atam jáne men» týyndylary qazaq tilinde jaryq kórdi. Sondaı-aq «Folıant» baspasy Ispanııa elshiliginiń kómegimen jas jazýshy Mıgel Reına Antolınniń «Luces en el mar» (Teńiz shuǵylasy) romanyn qazaq tiline aýdarý jumysyn qolǵa aldy.
Kezdesý ótetin oryn: Astana qalasy, Dostyq kóshesi 11 (Ulttyq akademııalyq kitaphananyń Konstıtýııa zaly)
Kúni: 14 jeltoqsan saǵ: 11:00
"Adyrna" ulttyq portaly
