وزبەكستان قازاقتارى توقاەۆقا ۇندەۋ تاستاپ، اتاجۇرتقا ورالىپ جاتقان قانداستارىمىز قانداي قيىنشىلىقتارعا تاپ بولاتىنىن باسا ايتتى. بۇل تۋرالى "ادىرنا" ۇلتتىق پورتالى جازادى.
"قۇرمەتتى قاسىم-جومارت كەمەلۇلى! ءبىز وزبەكستان رەسپۋبليكاسى، تاشكەنت وبلىسى، بوستاندىق اۋىلىنىڭ قازاقتارىمىز. تاۋەلسىزدىك العان جىلداردان كەيىن ەتنيكالىق قازاقتاردان اتاجۇرتقا ورالعاندارعا ءۇي سالۋعا جەر بەرىلەتىن ەدى. قازىرگى تاڭدا بۇل توقتاتىلدى. ۇلى كوشتىڭ بايلانۋىنا دا سەبەپ وسى. قازىرگى قانداستارىمىز اتاجۇرتقا ورالعاندا ءۇي سالۋ، جەر الۋ ماسەلەسى موينىمىزعا ۇلكەن جۇك سالۋدا. سول قانداستاردى اتاجۇرتقا قونىستاندىرۋ قاسيەتتى پارىزىمىز دەپ ءوزىڭىز سوزىڭىزدە تىلگە تيەك ەتكەندەي، ءۇي سالۋعا جەر بەرۋ ماسەلەسىن قايتادان جانداندىرۋىڭىزدى سۇرايمىز. وسى قازاقستانداعى تۇرعىلىقتى قازاق باۋىرلارىما ايتارىم وزگە ەلدە ءتىلدى، ءدىندى، سالت-ءداستۇردى، قازاق قىزدارىن وزگە ۇلتتارعا بەرمەي ساقتاپ كەلە جاتقان بالالارىمىزدى ساتقىن دەپ ايىپقا بۇيىرماۋلارىڭىزدى سۇرايمىن. بۇل سوۆەت وداعىنىڭ قۇيتۇرقى كورسوقىر ساياساتىنىڭ ارقاسىندا كەلگەن قاسىرەت. قازاق ءتىلىنىڭ، قازاق جەرىنىڭ قونشىسى قازاق قانا. ءبىر ءتىلىم جەردى وزىمىزدەن-ءوزىمىز قىزعانبايىق"-, دەدى قانداستارىمىز.
"ادىرنا" ۇلتتىق پورتالى
