بۇگىن ۇكىمەتتىڭ كەڭەيتىلگەن وتىرىسىندا توقاەۆ سمايىلوۆقا "جاڭا جىلعا ۇكىمەتتىڭ وسى قۇرامىمەن اياق باسۋعا بولا ما؟" دەپ سۇراق قويىپ، پرەمەر-مينيستردەن شىنايى جاۋاپ العىسى كەلەتىنىن ايتتى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
«ۇكىمەتتىڭ نەگىزگى مىندەتى – ەلىمىزدەگى ەكونوميكالىق ماسەلەلەردى شەشۋمەن اينالىسۋ. بۇل – ۇكىمەت مۇشەلەرىنىڭ، اكىمدەردىڭ، ۇلتتىق كومپانيا باسشىلارىنىڭ تىكەلەي جاۋاپكەرشىلىگى. سوندىقتان مەن پرەمەر-مينيستر ءاليحان اسحانۇلى سمايىلوۆتان شىنايى جاۋاپ العىم كەلەدى. جالپى، جاڭا جىلعا ۇكىمەتتىڭ وسى قۇرامىمەن اياق باسۋعا بولا ما؟ پرەزيدەنتتىڭ سايلاۋالدى باعدارلاماسىن جۇزەگە اسىرۋ ۇكىمەتتىڭ قولىنان كەلە مە؟ ۇكىمەت ىشتەن جانە سىرتتان بولاتىن بارلىق ەكونوميكالىق قاۋىپ-قاتەرلەرگە قارسى تۇرا الا ما؟ مەنىڭشە، بۇل ماسەلەلەر مەملەكەت باسشىسىنىڭ پرەمەر-مينيسترمەن جانە پارلامەنت دەپۋتاتتارىمەن وتكىزەتىن كونسۋلتاتسيالارى كەزىندە مۇقيات تالقىلانۋى كەرەك. الدىمىزدا تۇرعان مىندەتتەر – وتە كۇردەلى. بۇل مىندەتتەر بۇكىل ەل ازاماتتارىنا قاتىستى. سوندىقتان ءبىز پاراساتتى تۇردە، بىرلىگىمىزدى ساقتاپ، ءبارىمىز بىرگە ەڭبەك ەتۋىمىز كەرەك.
كەلەسى جىلدىڭ ءبىرىنشى جارتىسىندا ەلىمىزدە پارلامەنت سايلاۋى وتەدى. مەن ۇسىنعان ساياسي رەفورمالار باعدارلاماسىنا سايكەس زاڭ شىعارۋ بيلىگى جانە جەرگىلىكتى وكىلدى ورگاندار ساپالىق تۇرعىدان ماڭىزدى وزگەرىسكە ۇشىرايدى. ۇكىمەت تە وسى رەفورما ۇدەرىسىنەن تىس قالماۋعا ءتيىس. بۇل جۇمىس ءبىر ۋاقىتتا، ءبىر قارقىنمەن جۇرگىزىلۋى كەرەك. سول سەبەپتى، مەن بارشا ۇكىمەت مۇشەلەرى وسى ماسەلە جونىندە ويلانۋى كەرەك دەپ سانايمىن. حالقىمىزدىڭ يگىلىگى ءۇشىن جاساپ جاتقان جۇمىستارىڭىز تابىستى بولسىن»، - دەدى توقاەۆ.
"ادىرنا" ۇلتتىق پورتالى
